నిజామాబాద్ వేల్పూరు మండలం మోతే గ్రామంలో చిరుతపులి పిల్ల కలకలం

నిజామాబాద్ జిల్లా వేల్పూరు మండలం మోతే గ్రామ శివార్లలో చిరుతపులి పిల్ల కనిపించింది. ఉదయం పొలం పనులకు వెళ్తున్న రైతులకు వరి చేనులో ఈ పిల్ల కనిపించింది.

దీంతో రైతులు ఆందోళన చెందుతున్నారు. తల్లి చిరుత పక్కనే ఉండి ఉండవచ్చని వారు భయపడుతున్నారు. పొలాలకు వెళ్లాలంటే రైతులు ఇబ్బంది పడుతున్నారు. రాత్రి వేళల్లో చిరుత గ్రామంలోకి వచ్చే ప్రమాదం ఉందని గ్రామస్థులు ఆందోళన వ్యక్తం చేస్తున్నారు.

గ్రామస్థులు అటవీ శాఖ అధికారులకు సమాచారం ఇచ్చారు. చిరుతను, దాని పిల్లలను పట్టుకుని అడవిలో వదిలేయాలని కోరారు. వెంటనే చర్యలు తీసుకోవాలని డిమాండ్ చేశారు.

అడవిలో నీటి కొరత ఉందని రైతులు చెప్తున్నారు. అందువల్లే చిరుతలు గ్రామాల వైపు, వరి చేనుల వైపు వస్తున్నాయని వారు చెప్తున్నారు.