‘భారత్ సమ్మిట్’పై బీజేపీ విమర్శలు.. రాహుల్ గాంధీ క్షమాపణ కోరాలని డిమాండ్

కాంగ్రెస్ ఆధ్వర్యంలో జరిగిన ‘భారత్ సమ్మిట్’ను ‘భారత్ బద్నామ్ సమ్మిట్’ అని అభివర్ణిస్తూ బీజేపీ తీవ్ర విమర్శలు చేసింది. ఈ సమ్మిట్‌లో దేశ ప్రజాస్వామ్యాన్ని, ప్రధాని నరేంద్ర మోదీ ప్రభుత్వాన్ని రాహుల్ గాంధీ కించపరిచారని ఆ పార్టీ ఆరోపించింది.

సమ్మిట్‌కు హాజరైన విదేశీ ప్రతినిధుల నేపథ్యంపై బీజేపీ ప్రశ్నలు లేవనెత్తింది. వారిలో పలువురికి అనుమానాస్పద నేపథ్యం ఉందని, భారత వ్యతిరేక కార్యకలాపాలకు నిధులు సమకూర్చే జార్జ్ సోరోస్ అనుబంధ సంస్థలతో వారికి సంబంధాలు ఉన్నాయని ఆ పార్టీ ఆరోపించింది. ఈ విషయంపై కాంగ్రెస్ వెంటనే స్పష్టత ఇవ్వాలని, ప్రతినిధుల నేపథ్యాన్ని బహిరంగపరచాలని డిమాండ్ చేసింది.

2014 తర్వాత దేశంలో ప్రజాస్వామ్యం లేదని రాహుల్ గాంధీ చేసిన వ్యాఖ్యలను బీజేపీ తిరస్కరించింది. 2014కు ముందు కాంగ్రెస్ అధికారంలో ఉన్నప్పుడు దేశంలో అత్యవసర పరిస్థితి విధించింది తమ పార్టీయేనని ఆయన గుర్తుంచుకోవాలని పేర్కొంది. ప్రజాస్వామ్యబద్ధంగా ఎన్నికైన ప్రభుత్వాలను బర్తరఫ్ చేసిన చరిత్ర కాంగ్రెస్‌దేనని ఆ పార్టీ మండిపడింది.

ప్రజలు వరుసగా మూడుసార్లు నరేంద్ర మోదీ నేతృత్వంలోని బీజేపీని ఎన్నుకోవడాన్ని రాహుల్ గాంధీ జీర్ణించుకోలేకపోతున్నారని బీజేపీ అభివర్ణించింది. దేశ సార్వభౌమాధికారానికి సంబంధించిన అంశాలపై విదేశీ ప్రతినిధి వ్యాఖ్యలు చేయడం, వాటికి రాహుల్ గాంధీ చప్పట్లు కొట్టడం దేశ ప్రజలకు, ప్రజాస్వామ్యానికి అవమానమని ఆ పార్టీ పేర్కొంది.

దేశ ప్రజలను, ప్రజాస్వామ్యాన్ని అవమానించినందుకు రాహుల్ గాంధీ మొత్తం దేశానికి క్షమాపణ చెప్పాలని బీజేపీ డిమాండ్ చేసింది.