బెంగాల్ తరహాలో తెలంగాణలోనూ విజయం సాధిస్తామన్న బీజేపీ చీఫ్ రామచంద్రరావు

హైదరాబాద్‌లోని నాంపల్లి బీజేపీ రాష్ట్ర కార్యాలయంలో శ్యామ ప్రసాద్ ముఖర్జీ బలిదాన్ దివాస్ సందర్భంగా ఏర్పాటు చేసిన కార్యక్రమంలో బీజేపీ తెలంగాణ రాష్ట్ర అధ్యక్షుడు రామచంద్రరావు మాట్లాడారు. రాబోయే ఎన్నికల్లో పార్టీ తెలంగాణలోనూ బెంగాల్‌లో మాదిరిగానే విజయం సాధించి జెండా ఎగురవేస్తుందని ఆయన ధీమా వ్యక్తం చేశారు.

రాష్ట్రంలో గత 10 ఏళ్ల బీఆర్ఎస్ పాలన, ఆ తర్వాత 2.5 ఏళ్ల కాంగ్రెస్ పాలనతో ప్రజలు విసిగిపోయారని రామచంద్రరావు అన్నారు. కేంద్రంలో ప్రధాని నరేంద్ర మోదీ పాలనలో దేశం వేగంగా అభివృద్ధి చెందుతోందని, అన్ని రాష్ట్రాలకు పార్టీలతో సంబంధం లేకుండా కేంద్రం సమానంగా నిధులు కేటాయిస్తోందని ఆయన పేర్కొన్నారు. ఈ కార్యక్రమంలో మాజీ గవర్నర్లు దత్తాత్రేయ, విద్యాసాగర్ రావు పాల్గొన్నారు.

రామచంద్రరావు ఆర్టీసీ కళాభవన్లో జరిగిన యువత సమ్మేళనంలోనూ పాల్గొన్నారు. రాబోయే ఎన్నికల్లో యువత, మహిళలకు పెద్ద ఎత్తున అవకాశం కల్పిస్తామన్నారు. విద్యార్థులు చదువుతో పాటు రాజకీయ చైతన్యం పెంపొందించుకోవాలని సూచించారు. ఇంజనీరింగ్‌కే పరిమితం కాకుండా బీఏ, బీకాం, బీఎస్సీ కోర్సులు చేయాలని యువతకు సలహా ఇచ్చారు.

బీజేపీ నేత ఏలేటి మహేశ్వర్ రెడ్డి మాట్లాడుతూ, 2014 తర్వాత దేశం ప్రపంచ వేదికపై గుర్తింపు పొందిందని, మేడ్ ఇన్ ఇండియా ఫైటర్ జెట్ ఇంజన్లను తయారు చేస్తున్నామని చెప్పారు. దేశంలోని కొన్ని శక్తులు యువతను రెచ్చగొట్టి దేశ విచ్ఛిన్నానికి కుట్రలు చేస్తున్నాయని ఆరోపించారు. అనంతరం మల్కాజిగిరికి చెందిన పలువురు బీజేపీలో చేరగా, రామచంద్రరావు వారికి పార్టీ కండువా కప్పి ఆహ్వానించారు.