ఢిల్లీలో తెలంగాణ బీజేపీ నేతలతో నితిన్ నబీన్ సమావేశం

ఇవాళ మధ్యాహ్నం 3 గంటలకు ఢిల్లీలో బీజేపీ నేత నితిన్ నబీన్ తెలంగాణ బీజేపీ నాయకులతో సమావేశం కానున్నారు. రాష్ట్ర అధ్యక్షుడు రామచంద్రరావు, ఎమ్మెల్యేలు, ఎమ్మెల్సీలు, ఎంపీలు ఈ భేటీకి హాజరవుతారు.

రాష్ట్ర పార్టీ వ్యవహారాల ఇన్ఛార్జ్ అభయ్ పాటీల్ ఇప్పటికే జాతీయ నాయకత్వానికి సమగ్ర నివేదిక సమర్పించారు. ఈ నివేదిక ఆధారంగా సమావేశంలో పలు అంశాలు చర్చించనున్నారు.

రాష్ట్రంలో మారుతున్న రాజకీయ సమీకరణలు, నాయకుల మధ్య సమన్వయం, అంతర్గత విభేదాలు తగ్గించే చర్యలపై చర్చ జరుగుతుంది. సీనియర్ నేతలకు ప్రత్యేక బాధ్యతలు కేటాయించే అవకాశం ఉంది. కాంగ్రెస్ ప్రభుత్వంపై విమర్శలు, ప్రజా సమస్యలపై ఉద్యమాలు చేపట్టడంపై దిశానిర్దేశం చేస్తారు.

యువత, జెన్ జీ ఓటర్లను ఆకర్షించేందుకు టెక్నాలజీ, డిజిటల్ మీడియా వినియోగంపై నేతలకు సూచనలు ఇవ్వనున్నారు. ‘మిషన్ తెలంగాణ’ పేరుతో వచ్చే ఎన్నికల్లో అధికారం సాధించడమే లక్ష్యంగా బీజేపీ వ్యూహాలు రచిస్తోంది.