చూపు లేకపోయినా స్పర్శతో పంటలు పండిస్తున్న బీహార్ రైతు ప్రమోద్ సింగ్

బీహార్‌లోని వైశాలి జిల్లా బసంత గ్రామానికి చెందిన ప్రమోద్ సింగ్ అనే రైతు చిన్నప్పటి నుంచి దృష్టి లోపంతో బాధపడుతున్నాడు. అయినా వ్యవసాయం పై తనకున్న మక్కువతో పంటలు పండిస్తున్నాడు.

ప్రతి రోజు ఉదయం పొలానికి వెళ్లే ప్రమోద్ మొక్కలను చేతులతో తాకి పరిశీలిస్తాడు. ఆకుల స్పర్శ, మొక్క ఎత్తు, నేల తేమ ఆధారంగా పంట పరిస్థితిని అంచనా వేస్తాడు. ఈ విధానంతో ఆయన తన 10 ఎకరాల పొలంలో పుచ్చకాయ, టమోటా, ఇతర కూరగాయలు విజయవంతంగా పండిస్తున్నాడు.

ప్రమోద్ సింగ్ పొలంలో పని చేయడానికి కూలీలను నియమించుకుంటాడు. వారికి తగిన సూచనలు ఇస్తూ దిగుబడి పెంచుతాడు. ఈ ఏడాది 5 లక్షల రూపాయలు పెట్టుబడి పెట్టి పుచ్చకాయ సాగు చేశాడు. ఆయన అంచనా ప్రకారం 10 లక్షల రూపాయల లాభం వస్తుంది.

ప్రమోద్ సింగ్ విజయం గ్రామంలోని ఇతర రైతులకు స్ఫూర్తిగా మారింది. వ్యవసాయం మానేసి వలస వెళ్లిన చాలా మంది తిరిగి వచ్చి సాగు మొదలుపెట్టారు. ఆయన పద్ధతులు నేర్చుకునేందుకు దూర ప్రాంతాల నుంచి రైతులు, వ్యవసాయ నిపుణులు వస్తున్నారు.