పర్యాటకుల భద్రత కోసం బోట్ ఆపరేటర్లకు CPR, AED శిక్షణ

పర్యాటకుల భద్రతను మెరుగుపరిచేందుకు తెలంగాణ రాష్ట్ర పర్యాటక శాఖ కీలక చర్య చేపట్టింది. బోటింగ్ సేవల్లో పాల్గొనే బోట్ ఆపరేటర్లకు CPR, AED శిక్షణ కార్యక్రమాన్ని ప్రారంభించింది.

మొదటి బ్యాచ్‌లో భాగంగా 30 మంది బోట్ ఆపరేటర్లు, టెక్నీషియన్లకు ఈ శిక్షణ అందించారు. హార్ట్ ఎటాక్, నీటిలో మునగడం వంటి అత్యవసర పరిస్థితుల్లో స్పందించే విధానం, సురక్షితంగా బోట్ నడపడం, ఇంజన్ నిర్వహణ, ప్రమాదాల సమయంలో ప్రయాణికులను ఎలా రక్షించాలనే అంశాలపై ప్రాక్టికల్ శిక్షణ ఇచ్చారు.

బోట్ ఆపరేటర్లు ఈ శిక్షణతో తమ బాధ్యత ప్రయాణికుల ప్రాణాలు కాపాడే స్థాయికి పెరిగిందని చెప్పారు. ఎలాంటి ఎమర్జెన్సీనైనా ధైర్యంగా ఎదుర్కొనే నైపుణ్యం లభించిందని తెలిపారు.

టూరిజం అధికారులు మాట్లాడుతూ, రాష్ట్రంలో బోటింగ్‌కు ఆదరణ పెరుగుతున్న నేపథ్యంలో ఈ శిక్షణ ద్వారా భద్రత మరింత బలోపేతం అవుతుందని పేర్కొన్నారు. రాష్ట్రవ్యాప్తంగా మరిన్ని బ్యాచ్‌లకు శిక్షణ ఇవ్వనున్నట్లు ప్రకటించారు.