బోరబండ ప్రభుత్వ పాఠశాలలో ఆధునిక సౌకర్యాలున్నా తరగతి గదుల కొరత

బోరబండలోని ప్రభుత్వ ఉన్నత పాఠశాలలో దాదాపు 2000 మంది విద్యార్థులు చదువుతున్నారు. ఈ పాఠశాలలో డిజిటల్ తరగతులు, కోడింగ్ శిక్షణ, అటల్ ల్యాబ్ వంటి ఆధునిక సౌకర్యాలు ఉన్నాయి. అయితే తరగతి గదుల కొరతతో విద్యార్థులు ఇబ్బందులు పడుతున్నారు.

పాఠశాల ప్రిన్సిపాల్ గీత మాట్లాడుతూ, ఈ స్కూల్‌ను పీఎం శ్రీగా ఎంపిక చేశారని, విద్యార్థులు ఏఐ టూల్స్, డిజిటల్ లెర్నింగ్‌తో కార్పొరేట్ స్కూళ్లకు దీటుగా తయారవుతున్నారని తెలిపారు. కానీ తరగతి గదుల కొరత పెద్ద సవాలుగా మారిందన్నారు.

కొత్త భవనం నిర్మాణానికి గతేడాది అనుమతి లభించింది. అయితే గ్రౌండ్ వాటర్ సమస్యతో పనులు ఆగిపోయాయి. దీంతో ప్రైమరీ విద్యార్థులకు ఉదయం 9 నుంచి 12 వరకు, హైస్కూల్ విద్యార్థులకు మధ్యాహ్నం నుంచి సాయంత్రం 5 గంటల వరకు షిఫ్ట్‌లలో బోధన జరుగుతోంది. రేకుల షెడ్‌లో వేడి ఎక్కువగా ఉండడంతో తరగతులు నిర్వహించడం లేదు.

ఉపాధ్యాయుల కొరత కూడా ఉంది. అయినప్పటికీ పరీక్షా ఫలితాల్లో స్కూల్ మంచి ప్రతిభ కనబరుస్తోంది. భవన నిర్మాణం త్వరగా పూర్తి చేయాలని, ఉపాధ్యాయుల సంఖ్య పెంచాలని స్కూల్ వర్గాలు కోరుతున్నాయి.