కేబుల్ ఆపరేటర్ల కొత్త టెక్నాలజీ అవగాహన సదస్సు — ఒకే యాప్‌లో OTT, ఇంటర్నెట్ టీవీ సేవలు

ఉమ్మడి తూర్పు గోదావరి జిల్లా కేబుల్ ఆపరేటర్ల సంఘం ఆధ్వర్యంలో కోనసీమ జిల్లాలోని రావులపాలెంలో నూతన సాంకేతికతపై అవగాహన సదస్సు నిర్వహించారు. ఈ సదస్సులో కేబుల్ ప్రసారాలను ఇంటర్నెట్ ద్వారా ఎలా అందించాలి, సెటప్ బాక్స్ లేకుండా యాప్ తో టీవీ ఎలా చూడాలి అనే అంశాలపై వివరించారు.

BCN సంస్థ శ్రీనివాసరాజు మాట్లాడుతూ, కంపెనీ కొత్తగా తెచ్చిన 'నీలిన్' యాప్ లక్షణాలను వివరించారు. భవిష్యత్తులో ఒకే యాప్‌లో అన్ని OTT ప్లాట్‌ఫామ్‌లు, ఇంటర్నెట్, కేబుల్ ప్రసారాలు అందుబాటులోకి రావడం వలన వినియోగదారులకు, కేబుల్ ఆపరేటర్లకు ప్రయోజనం కలుగుతుందని తెలిపారు.

సంఘం అధ్యక్షులు కేఆర్ కృష్ణారెడ్డి మాట్లాడుతూ, గ్రామీణ ప్రాంతాల్లో టెక్నాలజీ వినియోగాన్ని ప్రోత్సహించేందుకు కృషి చేస్తున్నామని అన్నారు. కేబుల్ రంగంలో ఇంటర్నెట్ ఆధారిత సేవలు అనివార్యమవుతున్న నేపథ్యంలో ఆపరేటర్లు మార్పును స్వీకరించాలని సూచించారు. దేశవ్యాప్తంగా కేబుల్ చందాదారుల సంఖ్య తగ్గుతోందని, సర్వీసు సమస్యలు, రెండో తరం కార్యకర్తలు రాకపోవడం వంటి కారణాలతో ఈ పరిస్థితి ఏర్పడిందని వివరించారు. ఇంటర్నెట్ డెలివరీ విధానాన్ని అనుసరించకపోతే వ్యాపారం దెబ్బతింటుందని హెచ్చరించారు.