పశ్చిమ గోదావరి: కాలువలోకి దూసుకెళ్లిన కారు, నలుగురు గల్లంతు

పశ్చిమ గోదావరి జిల్లా ఇరగవరం మండలం ఐతంపూడి లాకుల వద్ద ఓ కారు కాలువలోకి దూసుకెళ్లింది. ఈ ఘటనలో కారులో ఉన్న నలుగురు గల్లంతయ్యారు. మరో వ్యక్తి ప్రమాదం నుంచి బయటపడ్డాడు.

కారులోని వారు పెరవలిలో జరిగిన వివాహ వేడుకకు హాజరై తిరిగి వస్తున్నారు. వీరంతా నరసాపురంలోని స్వర్ణాంధ్ర కాలేజీలో ఇంజనీరింగ్ రెండో సంవత్సరం చదువుతున్నట్లు తెలుస్తోంది. నాగభత్తుల సాయి సూర్య అన్నయ్య వివాహం నిన్న రాత్రి పెరవలిలో జరిగింది.

గల్లంతైన వారిలో లక్ష్మీ భాను, నాగిరెడ్డి, నాగభత్తుల సాయి సూర్య, రాజారాం ఉన్నారని తెలుస్తోంది. బయటపడిన సంతోష్ అనే వ్యక్తి చెప్పిన వివరాల ప్రకారం, ప్రయాణం సమయంలో వర్షం కారణంగా రోడ్డు సరిగా కనిపించలేదు. దాంతో కారు అదుపు తప్పింది.

సంతోష్ చెట్టు కొమ్మను పట్టుకున్నాడు. రోడ్డుపై వెళ్తున్న వారు ఆయనను పైకి లాగారు. సమాచారం అందుకున్న పోలీసులు, అగ్నిమాపక సిబ్బంది ఘటనాస్థలికి చేరుకున్నారు. కాలువలో గల్లంతైన వారి కోసం గాలింపు కొనసాగుతోంది. ప్రమాద కారణాలపై పోలీసులు దర్యాప్తు చేస్తున్నారు.