E20 పెట్రోల్: అపోహలను ఖండించిన కేంద్రం – ఇంజన్ డ్యామేజీ, మైలేజ్ తగ్గుదల వదంతులే

E20 (20% ఇథనాల్, 80% పెట్రోల్) పై సోషల్ మీడియాలో వైరల్ అవుతున్న అపోహలను కేంద్ర పెట్రోలియం మంత్రిత్వ శాఖ ఖండించింది. E20 వల్ల ఇంజన్ దెబ్బతింటుంది, మైలేజ్ భారీగా తగ్గిపోతుంది, వాహన ఇన్సూరెన్స్ రద్దవుతుందనే ప్రచారాలు అవాస్తవమని ప్రభుత్వం స్పష్టం చేసింది.

ఆటోమేటివ్ రీసెర్చ్ అసోసియేషన్ ఆఫ్ ఇండియా, ఇండియన్ ఆయిల్, ఆటోమొబైల్ సంస్థలు కలిసి నిర్వహించిన పరీక్షల్లో ఇంజన్‌కు పెద్దగా నష్టం జరగలేదని తేలింది. E20 వాడితే మైలేజ్ 3% నుంచి 4% మాత్రమే తగ్గవచ్చని, మొత్తం మైలేజ్ పడిపోదని నిపుణులు చెప్పారు. E20 కి అనుకూలమైన వాహనాలకు వారంటీ, ఇన్సూరెన్స్ యధావిధిగా కొనసాగుతాయని మంత్రిత్వ శాఖ హామీ ఇచ్చింది.

ఇథనాల్ తయారీలో చక్కెర ఉండడం వల్ల చీమలు, తేనెటీగలు ఆకర్షితమవుతాయన్న ప్రచారాన్ని కూడా ప్రభుత్వం తోసిపుచ్చింది. ఇంధన తయారీ ప్రక్రియలో చక్కెర పూర్తిగా తొలగిపోతుందని, దానికి శాస్త్రీయ ఆధారం లేదని తెలిపింది. ఇథనాల్ కోసం లీటరుకు వేల లీటర్ల నీరు వాడుతున్నారనే ఆరోపణలు నిజం కాదని, నీటి రీసైక్లింగ్ వ్యవస్థలు అమలులో ఉన్నాయని వివరించింది.

ఎథనాల్ మిశ్రమ ఇంధనాన్ని అమెరికా, బ్రెజిల్, కెనడా, జపాన్ వంటి దేశాలు దశాబ్దాల నుంచి వాడుతున్నట్లు ప్రభుత్వం గుర్తు చేసింది. ఎథనాల్ బ్లెండింగ్ వల్ల దేశానికి లక్షల కోట్ల రూపాయల విదేశీ మారక ద్రవ్యం ఆదా అవుతుందని, రైతుల ఆదాయం పెరుగుతుందని చెప్పింది. పాత వాహనాల్లో కొన్ని రబ్బరు భాగాలు ముందుగా మార్చాల్సిన పరిస్థితి రావచ్చని నిపుణులు హెచ్చరించినా, ఇంజన్ వ్యవస్థకు మొత్తంగా నష్టం లేదని స్పష్టం చేశారు.

సోషల్ మీడియాలో వచ్చే అపోహలను నమ్మకుండా, తమ వాహనం E20 కి అనుకూలమో కాదో అధికారిక సమాచారం ఆధారంగా తెలుసుకోవాలని, ప్రభుత్వ వివరాల ప్రకారం నిర్ణయాలు తీసుకోవాలని నిపుణులు సూచించారు.