పీఎం పోషణ్ స్కీమ్ను ఇంటర్ వరకు విస్తరిస్తూ బ్రేక్‌ఫాస్ట్ కల్పించాలని కేంద్రం ప్రతిపాదన

ప్రభుత్వ పాఠశాలల్లో చదివే విద్యార్థులకు బ్రేక్‌ఫాస్ట్ సదుపాయం కల్పించాలని కేంద్రం భావిస్తోంది. ప్రస్తుతం 1 నుంచి 8వ తరగతి వరకు అమలవుతున్న పీఎం పోషణ్ పథకాన్ని ఇంటర్మీడియట్ వరకు విస్తరించాలని నిర్ణయించింది. దీనిపై కేంద్ర విద్యాశాఖ ఐదు అంశాలతో ప్రతిపాదనలు సిద్ధం చేసి రాష్ట్రాల అభిప్రాయాలు కోరింది.

కేంద్రం తాజా ప్రణాళిక ప్రకారం, వచ్చే ఆర్థిక సంవత్సరం నుంచి ఈ పథకం అమలు కానుంది. వంటగది కార్మికుల జీతాలు పెంచడంతో పాటు, ప్రతి పాఠశాలలో క్లౌడ్ కిచెన్ నిర్మాణానికి రూ.55 లక్షలు కేటాయిస్తారు. ప్రతి విద్యార్థికి ప్లేట్, గ్లాస్, చెంచా సైతం అందిస్తారు.

పీఎం పోషణ్ పథకం కోసం కేంద్రం 60% నిధులు సమకూరుస్తుంది. ఈ కొత్త విస్తరణతో సుమారు రూ.13,000 కోట్ల అదనపు ఖర్చు కాగా, మిగిలిన 40% నిధులు రాష్ట్ర ప్రభుత్వాలు భరించాల్సి ఉంటుంది. తెలంగాణలో ఇప్పటికే ప్రభుత్వ పాఠశాలల్లో మధ్యాహ్న భోజన పథకాన్ని ఇంటర్ వరకు విస్తరించారు, బ్రేక్‌ఫాస్ట్ పథకాన్ని కూడా ఇటీవల ప్రారంభించారు. కేంద్రం నిర్ణయంతో రాష్ట్రంపై ఆర్థిక భారం తగ్గుతుందని అధికారులు భావిస్తున్నారు.