డిప్యూటీ సీఎం పవన్ కల్యాణ్: టూరిజం, పంచాయతీరాజ్, ఫారెస్ట్ సమన్వయంతో కళాకారులకు మద్దతు

డిప్యూటీ ముఖ్యమంత్రి పవన్ కల్యాణ్, ఆంధ్రప్రదేశ్ హస్తకళాకారులకు మద్దతుగా టూరిజం, పంచాయతీరాజ్, అటవీ శాఖల సమన్వయంతో కార్యాచరణ రూపొందించనున్నట్లు ప్రకటించారు. ఆదివారం జరిగిన ఒక కార్యక్రమంలో మాట్లాడుతూ, ప్రతి కళాకారుడికి గుర్తింపు లభించేలా ఈ శాఖలను కలపాలని చెప్పారు.

చేనేత, హస్తకళల ప్రత్యేకత ఉన్న వివిధ గ్రామాలను టూరిజం‌తో అనుసంధానం చేయాలని సూచించారు. ఉదాహరణకు అరకులోని వెండి ఆర్ట్ సెంటర్‌ను టూరిజం ద్వారా ప్రోత్సహిస్తే, విదేశీయులు, సందర్శకులు వచ్చి కళాఖండాలు కొనుగోలు చేస్తారని వివరించారు.

ప్రస్తుతం విడివిడిగా ఉన్న ఈ పథకాలను సమగ్రంగా చేయడానికి సంబంధిత అధికారులతో త్వరలో సమావేశం నిర్వహిస్తామని హామీ ఇచ్చారు. ఎవరికైనా సమస్యలుంటే తన కార్యాలయానికి రావొచ్చునని, అవసరమైతే క్యాబినెట్‌లో, అసెంబ్లీలో లేవనెత్తుతానని చెప్పారు.

ఈ కార్యక్రమంలో స్వచ్ఛంద సేవకులు సుచిత్ర ఎల్లా తదితరులు పాల్గొన్నారు. కేవలం సేవా దృక్పథంతో వచ్చిన వారికి నగదు చెల్లించడం లేదని, అయినా తమ జీవితాలను బాగు చేయడానికి అండగా ఉంటామని అన్నారు.

చివరగా ‘వోకల్ ఫర్ లోకల్’ నుంచి ‘లోకల్ టు గ్లోబల్’ లక్ష్యంతో ఆంధ్రప్రదేశ్ కళాకారులను ప్రపంచ వేదికపైకి తీసుకెళ్లాలని పిలుపునిచ్చారు.