క్యాన్సర్ మందుల ధరలపై కేంద్రం కోత: 113 మందులపై 90% తగ్గింపు

క్యాన్సర్ చికిత్సకు వాడే మందుల ధరలను కేంద్ర ప్రభుత్వం గణనీయంగా తగ్గించింది. 113 రకాల మందులపై దాదాపు 90 శాతం వరకు, 679 బ్రాండ్లపై సుమారు 50 శాతం వరకు ధరలు తగ్గాయి.

దాదాపు ₹40,000 ఖరీదు చేసే ఒక మందు ఇప్పుడు దాదాపు ₹4,000కి అందుబాటులోకి వచ్చింది. ఎక్కువ మంది రోగులు వాడే 137 రకాల మందులను సర్వే ద్వారా గుర్తించి, వాటి ధరలను తగ్గించాలని కేంద్రం ఫార్మా కంపెనీలను కోరింది.

తగ్గిన ధరలకే ఈ మందులను అమ్మాలని కేంద్రం స్పష్టం చేసింది. మందు ధర ఎంత అనేది షాపుల్లో బ్యానర్‌గా ప్రదర్శించాలని కూడా ఆదేశించింది.

అయితే కొన్ని రిటైల్ షాపులు పాత ధరలకే మందులు అమ్ముతున్నాయి. పాత స్టాక్ ఉందని చెప్పి, కొత్త స్టాక్‌పై కూడా ఎక్కువ డబ్బులు వసూలు చేస్తున్నాయి. ఎక్కువ ధర వసూలు చేస్తే Pharma Sahi Daam యాప్ లేదా NPPA వెబ్‌సైట్‌లో ఫిర్యాదు చేయవచ్చు. బిల్లు, మందు ఫోటోలతో ఫిర్యాదు చేస్తే అధికారులు దర్యాప్తు చేస్తారు. ఎక్కువ తీసుకున్న డబ్బు తిరిగి ఇప్పించే అవకాశం కూడా ఉంది.

యాప్‌లో 137 మందుల పేర్లు, పాత ధరలు, కొత్త ధరలతో పాటు 679 బ్రాండ్ల జాబితా కనిపిస్తుంది. నియమాలు ఉల్లంఘించి ఎక్కువ ధరలు వసూలు చేస్తే కఠిన చర్యలు తీసుకుంటామని కేంద్రం హెచ్చరించింది. తమకు అవసరమైన మందు తగ్గిన ధరల జాబితాలో ఉందా లేదా అని రోగులు యాప్ లేదా వెబ్‌సైట్‌లో చూసుకోవచ్చు.