శ్రీకాళహస్తి ఆలయ వంటశాలలో గ్యాస్ సిలిండర్ పేలుడు, మంటలు అదుపులోకి

తిరుపతి జిల్లా శ్రీకాళహస్తి ఆలయంలోని అన్నప్రసాద వంటశాలలో గ్యాస్ సిలిండర్ పేలి మంటలు చెలరేగాయి. ఈ ప్రమాదంలో ఎవరికీ ప్రాణాపాయం జరగలేదని అధికారులు తెలిపారు.

గ్యాస్ లీకేజీ కారణంగా ఒక సిలిండర్ పేలినట్లు అధికారులు గుర్తించారు. వంటశాల గోడలపై పేరుకుపోయిన నూనెకు మంటలు అంటుకుని, అవి పక్కన ఉన్న ప్రాంతాలకు వ్యాపించాయి. దట్టమైన పొగ ఆలయ పరిసరాలను కమ్మేసింది.

వంటశాలలో పని చేస్తున్న కార్మికులకు చిన్న గాయాలు తగిలాయని, వారిని ఆసుపత్రికి తరలించినట్లు అధికారులు చెప్పారు. భక్తుల కోసం తయారు చేసిన 50 వేల నుంచి 60 వేల వరకు లడ్డూ ప్రసాదాలు, పులిహార ప్యాకెట్లు మంటల్లో కాలిపోయినట్లు తెలుస్తోంది.

సంఘటన జరిగిన వెంటనే అగ్నిమాపక సిబ్బంది, ఫైర్ సేఫ్టీ సిబ్బంది, ఆలయ భద్రతా సిబ్బంది ఘటనాస్థలానికి చేరుకున్నారు. మూడు ఫైర్ ఇంజిన్ల సాయంతో మంటలను అదుపు చేశారు. మహాద్వారం వద్ద భక్తులను ఆపివేసి, మంటలు ఆలయంలోకి వ్యాపించకుండా చర్యలు తీసుకున్నారు. ఆలయం లోపల ఉన్న భక్తులను దర్శనం చేయించి బయటికి పంపించారు.

వంటశాల శుభ్రత లోపం, గ్యాస్ పైప్‌లైన్ ఓవర్ హీట్ కారణంగా ఈ ప్రమాదం జరిగి ఉండొచ్చని అధికారులు ప్రాథమికంగా అంచనా వేస్తున్నారు. టెక్నికల్ టీమ్ ఇచ్చే నివేదిక ప్రకారం చర్యలు తీసుకుంటామని ఈఓ తెలిపారు. కారణాలపై దర్యాప్తు ప్రారంభమైంది.

గత వారం రోజుల నుంచి ఆలయానికి రోజుకు 50 వేల నుంచి 60 వేల మంది భక్తులు వస్తున్నట్లు సమాచారం. గత 10-15 సంవత్సరాల్లో వంటశాలలో ఇలాంటి ప్రమాదం జరగలేదని తెలుస్తోంది. ప్రస్తుతానికి ఆలయంలోకి భక్తులను అనుమతించడం లేదు.