అమరావతి, పోలవరం, విశాఖ స్టీల్‌కు కేంద్రం భారీ నిధులు: సీఎం చంద్రబాబు

నరసారావుపేటలో జరిగిన బహిరంగ సభలో సీఎం చంద్రబాబు నాయుడు రాష్ట్రంలోని పలు కీలక ప్రాజెక్టులకు కేంద్రం నుంచి భారీగా నిధులు లభించాయని ప్రకటించారు.

అమరావతి రాజధాని నిర్మాణానికి రూ.15,000 కోట్లు పునరుద్ధరించగా, పోలవరం ప్రాజెక్ట్ కు రూ.12,157 కోట్లు కేటాయించారు. విశాఖపట్నం స్టీల్ ప్లాంట్ ను తిరిగి ప్రారంభించేందుకు రూ.11,460 కోట్లు ఇవ్వడంతో ఆ ప్లాంట్ రివైవల్ సాధ్యమైంది.

ఇతర కేంద్ర ప్రాయోజిత పథకాల కింద 90 స్కీములను పునరుద్ధరించామని, దీని ద్వారా రూ.7,700 కోట్లు వచ్చాయని సీఎం వివరించారు. జల్ జీవన్ మిషన్ నుంచి రూ.28,000 కోట్లు తీసుకొచ్చామని, రాయలసీమను వ్యవసాయ హబ్‌గా మార్చేందుకు లక్ష కోట్ల రూపాయల పెట్టుబడి పెట్టనున్నట్లు తెలిపారు. ఇందులో రూ.40,000 కోట్లు కేంద్ర సహకారంతో రుణంగా, గ్రాంట్‌గా లభిస్తాయన్నారు.

కేంద్ర ఆర్థిక మంత్రి నిర్మలా సీతారామన్ ఈ ప్రాజెక్టులకు పూర్తి సహకారం అందించారని, వారిని ఆరు జిల్లాల్లో సమీక్ష సమావేశాలు నిర్వహించాలని కోరగా వెంటనే అంగీకరించారని ఆయన తెలిపారు. మరో ఆరు జిల్లాల్లోనూ ఇలాంటి కార్యక్రమాలు చేపట్టేందుకు త్వరలోనే మంత్రిని అభ్యర్థిస్తామని చెప్పారు.