మంగళగిరి రైల్వే స్టేషన్ ప్రారంభించిన మంత్రి నారా లోకేష్.. అమరావతి అభివృద్ధి, రైల్వే ప్రాధాన్యతపై వ్యాఖ్యలు

మంగళగిరి రైల్వే స్టేషన్ ను మంత్రి నారా లోకేష్ ప్రారంభించారు. అమృత్ భారత్ స్టేషన్ పథకంలో భాగంగా ఈ స్టేషన్ కొత్త హంగులతో సిద్ధమైంది. ఈ కార్యక్రమంలో కేంద్ర మంత్రి పెమ్మసాని చంద్రశేఖర్ కూడా పాల్గొన్నారు.

ఈ సందర్భంగా మంత్రి లోకేష్ మాట్లాడుతూ, ప్రస్తుత ప్రభుత్వం అధికారంలోకి వచ్చిన తర్వాత అమరావతి అభివృద్ధి పనులు వేగంగా సాగుతున్నాయని చెప్పారు. గత ప్రభుత్వం అమరావతి ప్రాజెక్టును నిర్లక్ష్యం చేసిందని ఆరోపించారు. రాజధాని అభివృద్ధికి ప్రస్తుత ప్రభుత్వం ప్రత్యేక ప్రాధాన్యత ఇస్తుందని లోకేష్ వివరించారు.

రైల్వేల ప్రాముఖ్యతపై కూడా లోకేష్ మాట్లాడారు. భారతదేశంలో అనేక సమస్యలు ఉన్నా, రైల్వేలు దేశాన్ని ఒక్కతాటిపై నడిపించే ఏకైక సంస్థ అని పేర్కొన్నారు. ప్రధానమంత్రి నరేంద్ర మోడీ నాయకత్వంలో రైల్వేలపై ప్రత్యేక దృష్టి పెట్టారని, వందేభారత్, బుల్లెట్ ట్రైన్, కవచ్ టెక్నాలజీ వంటి ఆధునికతను తీసుకొచ్చారని లోకేష్ అన్నారు. రైల్వే రంగంలో విప్లవాత్మక మార్పులు వచ్చాయని చెప్పారు.

ఈ సందర్భంగా మంగళగిరిలో ఎక్కువ ఎక్స్‌ప్రెస్ రైళ్లు ఆగేలా చేయాలని కేంద్ర మంత్రి చంద్రశేఖర్ ను లోకేష్ విజ్ఞప్తి చేశారు. రైల్వే స్టేషన్లు కేవలం ప్రయాణికులు ఎక్కి దిగే ప్రదేశాలుగా కాకుండా, ఆర్థిక కార్యకలాపాల కేంద్రాలుగా మారాలని సూచించారు.

అమరావతిలో భవనాలు నిర్మించడమే కాకుండా రోడ్డు, రైలు, విమాన కనెక్టివిటీ కూడా మెరుగుపరచాలని లోకేష్ చెప్పారు. రాష్ట్రాన్ని అన్ని రంగాల్లో ముందుకు తీసుకెళ్లి ఆంధ్రప్రదేశ్ ను నెంబర్ వన్ రాష్ట్రంగా తీర్చిదిద్దడమే లక్ష్యమని తెలిపారు.