మదనపల్లెలో రిలయన్స్ భాగస్వామ్యంతో వ్యవసాయ పాఠశాల: సీఎం చంద్రబాబు

అన్నమయ్య జిల్లా మదనపల్లెలో రిలయన్స్ భాగస్వామ్యంతో ఇండియన్ స్కూల్ ఆఫ్ అగ్రికల్చర్ (ISA) ఏర్పాటు చేస్తున్నట్లు ముఖ్యమంత్రి చంద్రబాబు నాయుడు ప్రకటించారు. కుప్పం పర్యటనలో ఆదివారం నిర్వహించిన బహిరంగ సభలో ఆయన ఈ విషయాన్ని వెల్లడించారు.

వ్యవసాయాన్ని లాభసాటిగా మార్చడానికి ఆధునిక పద్ధతులు, సాంకేతికతను ఈ ISA ప్రోత్సహిస్తుందని, రైతులకు శిక్షణ అందిస్తుందని సీఎం వివరించారు. కుప్పం నియోజకవర్గంలో రసాయనిక ఎరువులు, పురుగు మందులు పూర్తిగా వాడకుండా సహజ సేద్యం ద్వారా పంటలు పండించాలని రైతులను ఆయన కోరారు.

కుప్పం నియోజకవర్గాన్ని రసాయన రహిత వ్యవసాయానికి నమూనాగా తీర్చిదిద్దాలని, 3–4 ఏళ్లలో ఈ లక్ష్యం సాధించేందుకు ప్రణాళిక సిద్ధం చేయాలని అన్నారు. వచ్చే పర్యటనలో కుప్పం విమానాశ్రయ నిర్మాణానికి భూమిపూజ చేస్తానని కూడా చంద్రబాబు ప్రకటించారు.

తనపై, ఉప ముఖ్యమంత్రి పవన్ కళ్యాణ్ పై సోషల్ మీడియాలో తప్పుడు కామెంట్లు పెడుతూ బ్లాక్ మెయిల్ చేస్తున్నారని, అటువంటి వారికి గత ప్రభుత్వ హయాంలో నిధులు సమకూరాయని ఆయన ఆరోపించారు. జిల్లాలో ఫ్యాక్షనిజం అంశాలు ప్రస్తావించారు.