పోలవరం 2027 నాటికి పూర్తి, వంశధార-పెన్నా నదుల అనుసంధానం చేయాలి: సీఎం చంద్రబాబు

పోలవరం ప్రాజెక్టు 2027 మార్చి నాటికి పూర్తి చేయనున్నట్లు ముఖ్యమంత్రి చంద్రబాబు నాయుడు నేడు ప్రకటించారు. వంశధార-పెన్నా నదుల అనుసంధానం తన దీర్ఘకాలిక లక్ష్యమని ఆయన తెలిపారు.

2015 నుంచి 2025 మధ్య కాలంలో గోదావరి నుంచి కృష్ణకు 450 టీఎంసీ నీటిని తరలించామని, దీంతో కృష్ణా డెల్టా బాగుపడిందని ఆయన చెప్పారు. శ్రీశైలంలో నీటిని నిల్వ చేసి రాయలసీమకు ఇవ్వడం వల్ల అనంతపూర్ జిల్లాలో హార్టికల్చర్ అభివృద్ధి చెందిందని, లింగాల మండలం రాష్ట్రంలోనే అత్యధిక తలసరి ఆదాయం సాధించిందని పేర్కొన్నారు.

తాజాగా అధికారంలోకి వచ్చిన తర్వాత సాగునీటి రంగానికి పెద్దపీట వేశామని, రెండేళ్లలో 24 వేల కోట్లు ఖర్చు చేశామని సీఎం తెలిపారు. ఇటీవల తుంగభద్ర డ్యామ్‌కు 75 ఏళ్ల తర్వాత కొత్త గేట్లను, దవళేశ్వరం బ్యారేజీకి రూ.135 కోట్లతో మరమ్మతులు చేపట్టినట్లు వివరించారు. రాబోయే మూడేళ్లలో 36 ప్రాజెక్టులను రూ.35 వేల కోట్లతో పూర్తి చేస్తామని ప్రకటించారు.

పోలవరం ప్రాజెక్టు పనులు 89 శాతం పూర్తయ్యాయని, ఇప్పటివరకు కేంద్ర సహకారంతో రూ.7,100 కోట్లు ఖర్చు చేశామని ఆయన చెప్పారు. నిర్వాసితుల పునరావాసం కూడా చేపట్టామని, 2027 మార్చి నాటికి ప్రాజెక్టును జాతికి అంకితం చేస్తామని హామీ ఇచ్చారు.