IIIT హైదరాబాద్: సీసీ కెమెరాలతో వాయు కాలుష్యాన్ని అంచనా వేసే AI టెక్నాలజీ

IIIT హైదరాబాద్‌లోని స్మార్ట్ సిటీ లివింగ్ ల్యాబ్ శాస్త్రవేత్తలు వాయు కాలుష్యాన్ని కొలిచేందుకు ఒక కొత్త AI టెక్నాలజీని రూపొందించారు. దీని ద్వారా నగరంలో అడుగడుగునా ఉన్న సీసీ కెమెరాలు, ఆర్టిఫిషియల్ ఇంటెలిజెన్స్ సాయంతో గాలి నాణ్యతను పసిగట్టవచ్చు. ఇప్పటివరకు ఖరీదైన ఎయిర్ క్వాలిటీ సెన్సార్లపై ఆధారపడాల్సి వచ్చేది.

ఈ AI మోడల్‌లో వాహనాలను లెక్కించేందుకు యూలో (YOLO) ఆబ్జెక్ట్ డిటెక్షన్ ఆల్గరిథంను ఉపయోగిస్తారు. కెమెరాలు రోడ్డుపై ఎన్ని కార్లు, బైక్‌లు, లారీలు ఉన్నాయో గుర్తిస్తాయి. ఆ లెక్కల ఆధారంగా మరొక AI మోడల్ ఎంత కాలుష్యం సంభవిస్తుందో అంచనా వేస్తుంది. ఇంకా చెత్త తగలబెట్టడం వంటి చర్యల వల్ల కూడా కాలుష్యస్థాయిని విశ్లేషిస్తుంది.

ఈ డేటాను ఎడ్జ్ ప్రాసెసింగ్ ద్వారా ఇంటిగ్రేటెడ్ కమాండ్ కంట్రోల్ సెంటర్‌కు పంపిస్తారు. దీనివల్ల అధికారులకు నిజ సమయంలో కాలుష్య నివేదికలు అందుతాయి. ఏ మార్గాల్లో కాలుష్యం ఎక్కువగా ఉందో వెంటనే గుర్తించి ట్రాఫిక్ దారి మళ్ళించడం, స్కూళ్లు, ఆఫీసుల సమయాల్లో మార్పులు చేయడం వంటి నిర్ణయాలు తీసుకోవచ్చు.

రెండేళ్ల క్రితం ప్రారంభమైన ఈ ప్రాజెక్ట్‌లో మొదట్లో 82% ఖచ్చితత్వం ఉండేది. తాజాగా మోడల్‌ను మెరుగుపరచడంతో కాలుష్య అంచనాలో 90% ఖచ్చితత్వం సాధిస్తోంది. ఈ సాంకేతికతపై సంగారెడ్డి కలెక్టర్‌కు కూడా ప్రదర్శన ఇచ్చారు.

భవిష్యత్తులో ప్రభుత్వం ఈ టెక్నాలజీని అమలు చేస్తే హైదరాబాద్ వంటి నగరాల్లో వాయు కాలుష్య నియంత్రణ సులభంగా చేయవచ్చు. ప్రజల కోసం ఒక సిటీ యాప్ కూడా అభివృద్ధి చేస్తున్నారు. దీని ద్వారా ప్రజలు తాము వెళ్ళే మార్గంలో గాలి నాణ్యతను ముందుగా తెలుసుకోవచ్చు. డేటా భద్రతకు ప్రత్యేక చర్యలు తీసుకుంటారు.