తుఫాన్ నేపథ్యంలో CM చంద్రబాబు సమీక్ష: 17 జిల్లాలకు ప్రత్యేక ఏర్పాట్లు

తుఫాన్ సమయంలో ప్రాణాలు కాపాడటమే ప్రధాన లక్ష్యమని CM చంద్రబాబు అన్నారు. ప్రజలకు ఆహారం, తాగునీరు, విద్యుత్, వైద్యం, రవాణా అన్నింటిపై ప్రత్యేక శ్రద్ధ పెట్టామని ఆయన తెలిపారు. 17 జిల్లాల్లో ఈ ఏర్పాట్లు చేసినట్టు ఆయన చెప్పారు.

19,265 చౌకధరల దుకాణాల్లో రెండు నెలలకు సరిపోయే నిత్యావసర వస్తువులు నిల్వ చేశారు. వైద్యశాఖ దాదాపు 5,000 మంది గర్భిణులను ఆసుపత్రులకు తరలించింది. ఈ వారంలో 1,029 డెలివరీలు జరిగాయని CM చంద్రబాబు తెలిపారు. చివరి దశలో ఉన్న గర్భిణులందరికీ ఆసుపత్రుల్లో సురక్షిత డెలివరీలు చేయించామని ఆయన పేర్కొన్నారు.

897 వైద్య బృందాలను సిద్ధం చేశారు. 108 అంబులెన్సులు, 102 సేవలతో పాటు మొబైల్ మెడికల్ యూనిట్లు, అత్యవసర మందులు పంపించారు. యాంటీ స్నేక్ వెనమ్ కూడా అందుబాటులో ఉంచారు.

పారిశుద్ధ్యంపై ప్రత్యేక చర్యలు తీసుకుంటున్నారు. సురక్షిత తాగునీరు అందించేందుకు చర్యలు చేపట్టారు. విపత్తుల తర్వాత అంటువ్యాధుల ప్రమాదం ఉంటుందని CM హెచ్చరించారు.

మరిగిన నీరు తాగాలని, నీరు నిలిచే ప్రాంతాల్లో ఎక్కువసేపు తిరగకూడదని ప్రజలను ఆయన కోరారు. కనీస జాగ్రత్తలు పాటిస్తే ఆరోగ్యంగా ఉండవచ్చని చెప్పారు. ప్రజలు తగిన జాగ్రత్తలు తీసుకోవాలని ఆయన విజ్ఞప్తి చేశారు.