తిండి మార్పులతోనే షుగర్, బీపీ వంటి వ్యాధులు: సీఎం చంద్రబాబు

ముఖ్యమంత్రి చంద్రబాబు నాయుడు మాట్లాడుతూ, రాష్ట్రంలో దాదాపు 80 లక్షల మందికి బీపీ, షుగర్, క్యాన్సర్, కీళ్ల నొప్పులు, గుండె సమస్యల వంటి దీర్ఘకాలిక వ్యాధులు ఉన్నాయని అంచనా వేశారు.

ఇందుకు ప్రధాన కారణం ఆహారంలో వచ్చిన మార్పులేనని ఆయన వివరించారు. గతంలో ప్రజలు జొన్న, రాగి, సజ్జలు వంటి చిరుధాన్యాలు ఎక్కువగా తినేవారని, కానీ ఎన్టీఆర్ హయాంలో రూ.2 కేజీ బియ్యం పథకం ప్రవేశపెట్టిన తర్వాత అందరూ బియ్యం, తీపి పదార్థాలు ఎక్కువగా తినడం మొదలుపెట్టారని తెలిపారు.

ఫాస్ట్‌ఫుడ్డు, మొబైల్ ఫోన్ వినియోగం, సోషల్ మీడియా చూడటం వల్ల కూడా ఆరోగ్య సమస్యలు పెరుగుతున్నాయని హెచ్చరించారు. వంట గదే మందుల దుకాణంగా, తిండే ఔషధంగా భావించాలని సూచించారు.

ఆరోగ్య రహస్యాలను స్వయంగా వివరిస్తూ, తాను విశ్రాంతి లేకుండా పనిచేయడానికి కారణం జాగ్రత్తగా తీసుకునే ఆహారమేనని చెప్పారు. అంతేకాక, రాష్ట్ర ప్రభుత్వం ప్రతి పౌరుడి ఆరోగ్య ప్రొఫైల్ తయారుచేస్తుందని, డేటా అనలిటిక్స్ ద్వారా ఏ ఊరిలో ఎక్కువ అనారోగ్యం ఉందో ర్యాంకింగ్ ఇస్తామన్నారు.