చంద్రబాబు కుప్పంలో సీటీ స్కాన్, డయాలసిస్ కేంద్రాల ప్రారంభం

కుప్పం ఏరియా ఆసుపత్రిలో ముఖ్యమంత్రి చంద్రబాబు నాయుడు సీటీ స్కాన్, డయాలసిస్ కేంద్రాలను ప్రారంభించారు. కుప్పం పర్యటనలో భాగంగా ఆయన ఈ ఆసుపత్రిని సందర్శించారు.

ఈ సందర్భంగా చంద్రబాబు రోగులతో మాట్లాడారు. ఆరోగ్య పరీక్షలు చేయించుకోవడం, క్రమం తప్పకుండా వైద్యం తీసుకోవడం తప్పనిసరి అని వివరించారు. బీపీ ఉన్న రోగులు జాగ్రత్తగా ఉండాలని, ఉచితంగా వైద్యం చేస్తున్నామని చెప్పారు.

రోగులకు అవగాహన కల్పించేందుకు సంజీవిని ప్రాజెక్ట్ అమలు చేస్తున్నామని, ఉచితంగా మందులు ఇస్తున్నామని తెలిపారు. అయినా కొందరు రోగులు పరీక్షలు చేయించుకోవడం లేదని ఆవేదన వ్యక్తం చేశారు.

ఆసుపత్రిలో ప్రతిరోజూ వచ్చే ఔట్ పేషెంట్ల సంఖ్య, ఇతర పనుల వివరాలు అడిగి తెలుసుకున్నారు. కుప్పం నుంచే కాకుండా కర్నూలు, బెంగళూరు, తమిళనాడు వంటి ప్రాంతాల నుంచి కూడా రోగులు డయాలసిస్ కోసం ఇక్కడికి వస్తున్నట్టు సిబ్బంది వివరించారు.

ఈ కొత్త వైద్య సదుపాయాలతో కుప్పం, చుట్టుపక్కల ప్రాంతాల ప్రజలకు మెరుగైన వైద్యం అందుతుంది.