పార్లమెంట్ సమావేశాల కోసం టీడీపీ ఎంపీలకు చంద్రబాబు దిశా నిర్దేశం

ఆంధ్రప్రదేశ్ ముఖ్యమంత్రి చంద్రబాబు నాయుడు టీడీపీ పార్లమెంటరీ పార్టీ సమావేశం నిర్వహించారు. పార్లమెంట్ సమావేశాల్లో అనుసరించాల్సిన వ్యూహంపై ఎంపీలకు సూచనలు చేశారు.

ఈ సమావేశంలో ఏపీకి రావలసిన నిధులు, పెండింగ్ ప్రాజెక్టులపై ప్రత్యేకంగా చర్చించారు. డీలిమిటేషన్ బిల్లు, మహిళా రిజర్వేషన్లు, వికసిత్ భారత్ శిక్ష అధిష్ఠాన్ బిల్లు, ఆర్థిక-వ్యవసాయ పాలసీలు, ఇథనాల్ బ్లెండెడ్ పెట్రోల్, వివిధ ప్రాజెక్టులకు VGF అమలు తదితర అంశాలను సమీక్షించారు.

ఎంపీలు ప్రతిపక్ష పార్టీలు కేంద్రాన్ని ఇబ్బంది పెట్టే విధంగా సున్నితమైన అంశాలు లేవనెత్తితే, టీడీపీ తరపున గట్టి కౌంటర్లు ఇవ్వాలని చంద్రబాబు సూచించారు. రాష్ట్ర ప్రభుత్వ కార్యక్రమాలను ప్రజల్లోకి తీసుకెళ్లడంలో ఎంపీలు చొరవ చూపాలన్నారు. త్వరలోనే స్థానిక సంస్థల ఎన్నికలు జరుగనున్న నేపథ్యంలో, కూటమి పార్టీలతో సమన్వయం చేసుకుని అన్ని స్థానాలు గెలుచుకోవాలని, నిర్లక్ష్యం చేయవద్దని ఆదేశించారు. రాబోయే రోజుల్లో ప్రజా ప్రతినిధులు, పార్టీ యంత్రాంగానికి రెండు రోజుల వర్క్‌షాప్ నిర్వహించనున్నట్లు తెలిపారు.

వికసిత్ భారత్ శిక్ష అధిష్ఠాన్ బిల్లుపై లోతైన అధ్యయనం చేయాల్సిందిగా మంత్రి నారా లోకేశ్‌ను చంద్రబాబు ఆదేశించారు. మహిళా రిజర్వేషన్ బిల్లు (33 శాతం) కు టీడీపీ మద్దతు ఇస్తుందని స్పష్టం చేశారు. సోషల్ మీడియా వేదికగా జరుగుతున్న వ్యక్తిగత దూషణలపై కూడా ఎంపీలు పార్లమెంట్‌లో గళం ఎత్తాలని సూచించారు. పార్టీని కుటుంబంగా భావించి సమిష్టిగా ముందుకు సాగాలని లోకేశ్ నాయకులకు విజ్ఞప్తి చేశారు.