హైదరాబాద్ అభివృద్ధిపై మంత్రి నారా లోకేష్ వ్యాఖ్యలు

హైదరాబాద్‌లోని అభివృద్ధిని చూస్తే తనకు అసూయ కలుగుతుందని ఏపీ మంత్రి నారా లోకేష్ అన్నారు. హైదరాబాద్ ఎయిర్‌పోర్ట్, రైల్వే స్టేషన్, ఐటీ టవర్ వంటి మౌలిక సదుపాయాలు తనలో అసూయ పుట్టించాయని ఆయన చెప్పారు. ఆ అసూయే తనలో కసి పెంచిందని, అమరావతిని ఒక గ్లోబల్ సిటీగా తీర్చిదిద్దాలనే పట్టుదల కలిగించిందని వెల్లడించారు.

60 ఏళ్ల పాటు కష్టపడి హైదరాబాద్‌ను కలిసికట్టుగా అభివృద్ధి చేశామని, అయినా 2014లో కట్టుబట్టలతో మెడబట్టి బయటకు గెంటేశారని లోకేష్ ఆరోపించారు. హైదరాబాద్ ను చూసినప్పుడల్లా తనలో అసూయ, కసి రెండూ పెరుగుతున్నాయన్నారు. ఈ కారణంగానే విభజన తర్వాత అమరావతి నిర్మాణం తప్పనిసరి అని ఆయన పేర్కొన్నారు.

ఏపీ డిప్యూటీ సీఎం పవన్ కల్యాణ్ ఇటీవల తెలంగాణపై చేసిన విమర్శల నేపథ్యంలో లోకేష్ నుంచి ఈ వ్యాఖ్యలు వచ్చాయి. పవన్ వ్యాఖ్యలపై ఇంకా చర్చ కొనసాగుతున్న సమయంలోనే లోకేష్ ఇలాంటి ప్రకటన చేయడం రాజకీయ వర్గాల్లో చర్చకు దారితీసింది. ఈ విషయంపై తెలంగాణ నేతల స్పందన తెలియాల్సి ఉంది.

అమరావతి రాజధాని నిర్మాణంలో భాగంగా సీడ్ యాక్సెస్ రోడ్డుకు సంబంధించిన పనులను మంత్రి నారాయణ పరిశీలించారు. పాత గుంటూరు హైవేతో లింక్ చేసేందుకు రెండు స్టీల్ వంతెనల నిర్మాణం కొనసాగుతోంది.