ఏపీలో వర్షాభావం: జలధార జలహారతి నిరంతరం కొనసాగించాలని సీఎం చంద్రబాబు ఆదేశం

ఆంధ్రప్రదేశ్లో ఎల్నినో ప్రభావంతో వర్షపాతం సాధారణం కంటే 39% తగ్గే ప్రమాదం ఉన్న నేపథ్యంలో, ముఖ్యమంత్రి చంద్రబాబు నాయుడు జలధార జలహారతి కార్యక్రమాన్ని నిరంతరం కొనసాగించాలని అధికారులను ఆదేశించారు. ఆయన శనివారం వీడియో కాన్ఫరెన్స్ ద్వారా ఉన్నతాధికారులతో సమీక్ష నిర్వహించారు.

జూన్ నుంచి డిసెంబర్ వరకు రాష్ట్రంలో 867 మిల్లీమీటర్ల వర్షపాతం నమోదు కావాల్సి ఉండగా, ప్రస్తుతం 525 మిల్లీమీటర్లే నమోదయ్యే అవకాశం ఉందని వాతావరణ శాఖ అంచనా. దీంతో తాగునీటి కొరత, పంట నష్టం జరగకుండా ముందస్తు చర్యలు తీసుకోవాలని సీఎం సూచించారు. జలాశయాల్లో నీటి నిల్వలు గత ఏడాది 825.67 టీఎంసీల నుంచి 563 టీఎంసీలకు పడిపోయినట్లు అధికారులు తెలిపారు.

వెలుగోడు, కోరకల్లు, అవ్వుకు, జీడిపల్లి, చెర్లోపల్లి రిజర్వాయర్లలో తాగునీటి అవసరాల కోసం నీటిని నిల్వ చేయాలని ఆయన ఆదేశించారు. నీటి కొరత ఉన్న ప్రాంతాల్లో ట్యాంకర్ల ద్వారా నీటి సరఫరా చేయడంతో పాటు, ఎగువ నుంచి వచ్చే వరద నీటిని ఒడిసిపట్టి రిజర్వాయర్లను నింపాలని సీఎం చెప్పారు. ఇప్పటికే సాగులో ఉన్న పంటలను రక్షించే ప్రాధాన్యతతో నీటిని విడుదల చేయాలని, భవిష్యత్తులో తక్కువ నీటితో సాగు చేసే పంటలను ప్రోత్సహించాలని వ్యవసాయ శాఖకు దిశానిర్దేశం చేశారు.

జలధార జలహారతి పథకం కింద 82,865 పనుల్లో 79,826 పనులు ఇప్పటికే పూర్తయ్యాయని, దీనికి 3,409 కోట్ల రూపాయలు ఖర్చు అవుతుందని అధికారులు వివరించారు. పశువుల మేత కొరత ఏర్పడకుండా ముందస్తు ఏర్పాట్లు చేయాలని, నీటి పొదుపు, సంరక్షణపై ప్రజల్లో విస్తృత ప్రచారం చేపట్టాలని సీఎం ఆదేశించారు. కలెక్టర్లు క్షేత్రస్థాయిలో పర్యవేక్షణ చేపట్టాలని, ప్రతి నీటి బొట్టును సమర్థంగా వాడుకునేలా ప్రణాళికలు సిద్ధం చేయాలని సూచించారు.