రంపచోడవరం పర్యటనలో అధికారులకు చంద్రబాబు హెచ్చరిక; గత ప్రభుత్వం డ్రైవర్ హత్య చేసిందని ఆరోపణ

ఆంధ్రప్రదేశ్ ముఖ్యమంత్రి చంద్రబాబు నాయుడు సోమవారం రంపచోడవరంలో పర్యటించారు. ‘మెగా పేరెంట్స్ డే’ కార్యక్రమంలో పాల్గొన్నారు. ఈ సందర్భంగా అధికారుల పనితీరుపై అసంతృప్తి వ్యక్తం చేస్తూ హెచ్చరికలు జారీ చేశారు. గత వైఎస్ఆర్ కాంగ్రెస్ ప్రభుత్వంపై తీవ్ర ఆరోపణలు కూడా చేశారు.

మంత్రి నారా లోకేశ్తో కలిసి సీఎం తరగతి గదుల్లో విద్యార్థులతో ముచ్చటించారు. విద్యార్థులతో కలిసి మధ్యాహ్న భోజనం చేశారు. ‘తల్లికి వందనం’ లబ్ధిదారులతో సంభాషించారు.

అనంతరం 40 శాఖల పనితీరుపై అధికారులతో సమీక్ష నిర్వహించారు. “నో రికమండేషన్స్. మీరు మారతారా? నేను మార్చాలా?” అంటూ అధికారులను ప్రశ్నించారు. అధికారులు పరుగెత్తాలని, లేకుంటే తానే పరుగెత్తిస్తానని హెచ్చరించారు.

2024 ఎన్నికల్లో కూటమికి 94 శాతం సీట్లు లభించాయని, ఇది ఎన్డీఏపై ప్రజల నమ్మకాన్ని తెలియజేస్తోందని సీఎం చంద్రబాబు అన్నారు.

గత ప్రభుత్వం ఒక దళిత డ్రైవర్ను హత్య చేసి, అతని మృతదేహాన్ని కారులో ఇంటికి పంపించిందని ఆరోపించారు. “డోర్ డెలివరీ” చేశారని విమర్శించారు. ఇలాంటి రాజకీయ పార్టీల పట్ల ప్రజలు అప్రమత్తంగా ఉండాలని హెచ్చరించారు. ఈ ఆరోపణలపై వైఎస్ఆర్ కాంగ్రెస్ స్పందన తెలియాల్సి ఉంది.