మురసు తుఫాన్ సన్నద్ధతపై సీఎం చంద్రబాబు సమీక్ష; 8,000 విద్యుత్ స్తంభాలపై ప్రభావం అంచనా

మురసు తుఫాన్ కోస్తాంధ్ర తీరానికి అతి దగ్గరగా ఉంది. ఈ నేపథ్యంలో తుఫాన్ సన్నద్ధతపై ముఖ్యమంత్రి చంద్రబాబు అధికారులతో సమీక్ష నిర్వహించారు.

దక్షిణ కోస్తాంధ్ర నుంచి దిగువ జిల్లాలు, రాయలసీమలో మోస్తరు నుంచి భారీ వర్షాలు కురిసే సూచనలు ఉన్నాయి. నాగార్జున సాగర్, పులిచింతల ప్రాజెక్టు పరిధిలో వర్షాలు కురిసి ప్రవాహాలు వచ్చే అవకాశం ఉంది. 13 నుంచి 15 టీఎంసీల వరకు నీరు వచ్చే అవకాశం ఉందని అధికారులు సీఎంకు వివరించారు.

రియల్ టైం గవర్నెన్స్ సొసైటీ అధికారులు కలెక్టర్లతో క్షేత్ర స్థాయి సన్నద్ధతపై సమీక్షించారు. గతంలో వచ్చిన తుఫాను వల్ల జరిగిన నష్టం నుంచి చాలా ప్రాంతాలు సాధారణ స్థితికి వచ్చాయని సీఎం చెప్పారు. మురసు తుఫాను ప్రభావాన్ని కూడా సమర్థవంతంగా ఎదుర్కోవాల్సి ఉందని ఆయన అన్నారు.

గత తుఫాను సమయంలో శ్రీకాకుళం నుంచి కృష్ణా జిల్లా వరకు 31,000 విద్యుత్ స్తంభాలను క్షేత్ర స్థాయికి పంపినట్లు అధికారులు తెలిపారు. ఈసారి తుఫాను గాలుల వల్ల దక్షిణ కోస్తాంధ్ర, రాయలసీమ జిల్లాల్లో 8,000 వరకు విద్యుత్ స్తంభాలపై ప్రభావం పడే అవకాశం ఉందని వారు అంచనా వేస్తున్నారు. క్షేత్ర స్థాయిలో యంత్రాంగం సన్నద్ధంగా ఉందని అధికారులు చెప్పారు.

గుంటూరు, బాపట్ల, పల్నాడు, ప్రకాశం, నెల్లూరు, మార్కాపురం తదితర ప్రాంతాల్లో చెరువులు నీటితో నింపాలని సీఎం ఆదేశాలు జారీ చేశారు. సమర్థ నీటి నిర్వహణతో దక్షిణ కోస్తా రాయలసీమ బేసిన్‌లోని రిజర్వాయర్లలో నీటిని నింపాలని ఆయన ఆదేశించారు.