అమిత్‌ షాకు మరో నివేదిక పంపిస్తాం: సీఎం చంద్రబాబు

తుఫాను నష్టంపై కేంద్రానికి మరో నివేదిక పంపుతామని ముఖ్యమంత్రి చంద్రబాబు నాయుడు చెప్పారు. కేంద్ర హోంశాఖ మంత్రి అమిత్‌ షా ఇవాళ ఫోన్ చేసి వివరాలు అడిగారని, తాను బ్రీఫ్ చేసినట్లు ఆయన తెలిపారు.

తుఫాను వల్ల రాష్ట్రానికి ₹4,560 కోట్ల నష్టం జరిగినట్లు కేంద్ర కమిటీకి నివేదిక ఇచ్చినట్లు చంద్రబాబు చెప్పారు. కేంద్రం పంపిన కమిటీ రాష్ట్రానికి వచ్చి పరిశీలించి తిరిగి వెళ్లిందని, ఆ నివేదికను వారు ఢిల్లీకి తీసుకెళ్తున్నట్లు ఆయన వివరించారు. తుఫాను ప్రారంభంలోనే కేంద్రానికి సమాచారం అందించినట్లు, అప్పటికే ఇంటీరియం రిపోర్టు పంపినట్లు ఆయన తెలిపారు.

పొరుగు రాష్ట్రాల సహకారం గురించి కూడా ఆయన మాట్లాడారు. తెలంగాణ డిప్యూటీ సీఎం భట్టి విక్రమార్కకు ఫోన్ చేసి సిబ్బందిని వెంటనే పంపాలని కోరినట్లు చెప్పారు. తమిళనాడు, కర్ణాటక ప్రభుత్వాలతోనూ సమన్వయం చేసుకున్నట్లు, మూడు రాష్ట్రాలు కలిసి సహాయం చేసినట్లు ఆయన తెలిపారు. సహాయ సమన్వయంలో భేదాలు లేకుండా అందరి సహకారం తీసుకున్నట్లు చంద్రబాబు చెప్పారు. గతంలో ఒడిశాలో పెద్ద తుఫాను సమయంలోనూ తాము సహాయ కార్యక్రమాలు చేసినట్లు ఆయన గుర్తు చేశారు.

ఇవాళ సాయంత్రం మళ్లీ అమిత్‌ షాకు బ్రీఫ్ చేస్తామని, త్వరలో మరో రిపోర్టు పంపిస్తామని ముఖ్యమంత్రి తెలిపారు.