జొన్నగిరి గోల్డ్ మైన్‌ను సందర్శించనున్న సీఎం చంద్రబాబు

కర్నూలు జిల్లా జొన్నగిరి గోల్డ్ మైన్‌ను ముఖ్యమంత్రి చంద్రబాబు నాయుడు నేడు సందర్శించనున్నారు. జియో మైసూర్ సంస్థ ఆధ్వర్యంలోని ఈ గని గత నెలలో వాణిజ్య బంగారు ఉత్పత్తి ప్రారంభించింది. 597 ఎకరాల విస్తీర్ణంలో ఉన్న ఈ గని, స్వాతంత్ర్యం తర్వాత దేశంలో ఏర్పాటైన తొలి ప్రైవేట్ రంగ బంగారు గనిగా గుర్తింపు పొందింది.

ఈ ప్రాజెక్టుపై 405 కోట్ల రూపాయలకు పైగా పెట్టుబడి పెట్టారు. దీని ద్వారా 700 మందికి పైగా ప్రత్యక్ష ఉపాధి లభిస్తుందని, వీరిలో 80% మంది ఆంధ్రప్రదేశ్‌కు చెందిన వారేనని అంచనా. ప్రస్తుత ఆర్థిక సంవత్సరంలో 400 కిలోల బంగారు ఉత్పత్తి లక్ష్యంగా పెట్టుకోగా, భవిష్యత్తులో ఏడాదికి ఒక నుంచి రెండు టన్నుల సామర్థ్యానికి పెంచాలని ప్రణాళికలు ఉన్నాయి.

రాష్ట్రంలోని ఇతర ప్రాంతాల్లోనూ బంగారు అన్వేషణ కొనసాగుతోంది. చిత్తూరు జిల్లా కుప్పంలోని చిగురుగుంట–బిసనాత్తం బంగారు బ్లాక్‌లో సుమారు 22 లక్షల టన్నుల ఖనిజ నిల్వలు గుర్తించారు. ఈ బ్లాక్‌ను వేలం వేయాలని ప్రభుత్వం నిర్ణయించింది. అలాగే అనంతపురం జిల్లాలోని బోక్సంపల్లి, రామగిరి, జవకుల గోల్డ్ బ్లాక్‌లపై జియోలాజికల్ సర్వే ఆఫ్ ఇండియా, ప్రైవేట్ ఏజెన్సీల ద్వారా అన్వేషణ పనులు జరుగుతున్నాయి.

పారదర్శక వేలం, ప్రైవేట్ పెట్టుబడుల ఆకర్షణ, సుస్థిర మైనింగ్ విధానం ద్వారా రాష్ట్ర ఖనిజ వనరుల ద్వారా ఆదాయం, ఉపాధి అవకాశాలు పెంచేలా చర్యలు తీసుకుంటున్నట్లు ప్రభుత్వ వర్గాలు తెలిపాయి.