గిగ్ వర్కర్‌ల సంక్షేమ బోర్డు ఆగస్ట్ 15 నుండి సేవలు: ప్రభుత్వం

తెలంగాణలో ప్లాట్‌ఫామ్ ఆధారిత గిగ్ వర్కర్‌ల సంక్షేమ బోర్డు సేవలు ఆగస్ట్ 15 నుండి అందుబాటులోకి రానున్నట్లు అధికారిక సమాచారం.

ముఖ్యమంత్రి రేవంత్ రెడ్డి ప్రకటించిన ఈ చట్టం ప్రకారం, బోర్డు ఏర్పాటుకు కార్మిక శాఖ నివేదిక సమర్పించింది. రాష్ట్రంలో దాదాపు 5 లక్షల మంది గిగ్ వర్కర్లు (డెలివరీ బాయ్స్, క్యాబ్ డ్రైవర్లు, లాజిస్టిక్స్ సిబ్బంది) ఈ బోర్డు పరిధిలోకి వస్తారు.

బోర్డు ఏర్పాటైన తర్వాత ప్రతి గిగ్ వర్కర్‌కు ప్రత్యేక గుర్తింపు కార్డు (యూనిక్ ఐడి) ఇస్తారు. స్విగ్గి, జొమాటో, ఓలా, ఉబర్ వంటి అగ్రిగేటర్ సంస్థలు ప్రతి లావాదేవీపై 1-2% వెల్ఫేర్ ఫీజును బోర్డుకు చెల్లించాల్సి ఉంటుంది. నిబంధనలు ఉల్లంఘించిన సంస్థలకు రూ.50,000 వరకు జరిమానా విధించనున్నారు.

గిగ్ వర్కర్లకు ఇప్పటివరకు ఈఎస్ఐ, పీఎఫ్, ఇన్సూరెన్స్ వంటి సామాజిక భద్రతలు లేవు. కంపెనీలు ఇష్టారీతిగా ఐడిలు బ్లాక్ చేయడం, వేతన కోతలు, విధుల నుండి తొలగించడం వంటి ఇబ్బందులు ఎదుర్కొంటున్నారు. కొత్త చట్టం వల్ల ఈ సమస్యలకు పరిష్కారం లభిస్తుందని కార్మికులు భావిస్తున్నారు.

బోర్డు ద్వారా ప్రమాద సమయంలో సాయం, ఆరోగ్య బీమా, ప్రభుత్వ సంక్షేమ పథకాల అమలు కూడా వర్కర్లకు అందుతాయని అధికారులు తెలిపారు. దీని అమలు కోసం అధికారులు చివరి దశ కసరత్తు చేస్తున్నారు.