వెలుగొండ పునరావాసానికి రూ.300 కోట్లు విడుదల, మరో రూ.600 కోట్లు త్వరలో: సీఎం చంద్రబాబు

సీఎం చంద్రబాబు నాయుడు శనివారం నెల్లూరు జిల్లాలో పర్యటించారు. వెలుగొండ ప్రాజెక్టు పునరావాసం కోసం రూ.900 కోట్లు కేటాయించామని చెప్పారు. ఇప్పటికే రూ.300 కోట్లు విడుదల చేశామని, మిగిలిన రూ.600 కోట్లు త్వరలో విడుదల చేస్తామని తెలిపారు. వెలుగొండ ప్రాజెక్టు ఫేజ్ 1, ఫేజ్ 2 పూర్తి చేసేందుకు మొత్తం రూ.2,500 కోట్లు ఖర్చు చేస్తామని ప్రకటించారు.

పెన్నా-సర్వేపల్లి రిజర్వాయర్ను ఈ ఏడాది డిసెంబర్ నాటికి పూర్తి చేస్తామని ఆయన ప్రకటించారు. రాష్ట్రంలోని 36 సాగునీటి ప్రాజెక్టుల కోసం మూడేళ్ల క్యాలెండర్ రూపొందించామని, ఇప్పటికే రూ.24వేల కోట్లు ఖర్చు చేశామని వివరించారు. గత ప్రభుత్వ హయాంలో ప్రాజెక్టు పనులు పూర్తి కాలేదని అభిప్రాయపడ్డారు.

వాతావరణ మార్పుల ప్రభావంపై మాట్లాడుతూ, ఈ ఏడాది గోదావరి, కృష్ణ నదుల్లో వరదలు లేవని, దీనివల్ల రైతులు ఇబ్బందులు ఎదుర్కొంటున్నారని చెప్పారు. ప్రతి చుక్క నీటిని భూగర్భ జలాలుగా మార్చేందుకు ‘జలధార’ కార్యక్రమం చేపట్టామని తెలిపారు.

రాష్ట్రంలో చెన్నై నుండి ఇచ్చాపురం వరకు ఫోర్ లేన్ రైల్వే ట్రాక్ నిర్మాణం చేపట్టనున్నట్టు చెప్పారు. నెల్లూరు జిల్లాలో దుగ్గిరాజపట్నం విమానాశ్రయం ఏర్పాటు చేస్తామన్నారు. ఈ ప్రాజెక్టులతో ఆంధ్రప్రదేశ్ నంబర్ వన్ రాష్ట్రంగా మారుతుందని ఆశాభావం వ్యక్తం చేశారు.