హైదరాబాద్‌లో దాదాపు 10 లక్షల మంది ఓటర్లు రికార్డుల్లో లేరు

హైదరాబాద్ జిల్లా ఓటరు జాబితాలో దాదాపు 10 లక్షల మంది ఓటర్లు కనిపించడం లేదు. మొత్తం 47,36,669 మంది ఓటర్లలో 9,95,315 మంది గల్లంతయినట్టు అధికారులు గుర్తించారు.

ఇది మొత్తం ఓటర్లలో 21 శాతం. వీరిలో కొందరు మరణించిన వారు ఉన్నారు. మిగతా వారు ఎక్కడున్నారో తెలియడం లేదు. వారు ఇతర ప్రాంతాలకు వెళ్లి ఉండొచ్చని, లేదా ఇతర ప్రాంతాల నుంచి వచ్చి తిరిగి వెళ్లి ఉంటారని అధికారులు భావిస్తున్నారు.

జూబ్లీ హిల్స్ నియోజకవర్గంలో 88,933 మంది, అంబర్‌పేట నియోజకవర్గంలో 38,208 మంది ఈ తరహా ఓటర్లుగా ఉన్నారు. ఓటరు ఎన్యుమరేషన్ ఫారాలు సమర్పించే గడువు ఈ నెల 10వ తేదీ వరకు ఉంది. గడువు ఇప్పటికే రెండుసార్లు పొడిగించారు. అందువల్ల ఈ సంఖ్యలు మారే అవకాశం ఉంది.

ఇప్పటి వరకు 27,26,655 మంది ఎన్యుమరేషన్ ఫారాలు తిరిగి ఇచ్చారు. వారి వివరాలను డిజిటలైజ్ చేశారు. ఇది మొత్తం ఓటర్లలో 57.56 శాతం. మరో 4,91,236 మంది ఆన్‌లైన్‌లో ఫారాలు నింపారు.

ECI కార్యదర్శి ఆదేశాల ప్రకారం పోలింగ్ కేంద్రాల క్రమబద్ధీకరణ చేపడుతున్నారు. రాజకీయ నేతల ఇళ్లు, మతపరమైన ప్రదేశాలు, సున్నిత ప్రాంతాల్లో పోలింగ్ కేంద్రాలు ఉండకూడదన్న నిబంధన ప్రకారం 94 భవనాల్లోని కేంద్రాలను మార్చాలని ప్రతిపాదించారు.

39 పోలింగ్ కేంద్రాల పేర్లు మార్చాలని గుర్తించారు. తక్కువ ఓటర్లున్న 71 పోలింగ్ కేంద్రాలను విలీనం చేయడం లేదా రద్దు చేయడం చేస్తారు. ఓటర్లు ఎక్కువగా ఉన్న ప్రాంతాల్లో నాలుగు కొత్త కేంద్రాలు ఏర్పాటు చేయనున్నారు. ప్రస్తుతం జిల్లాలో 4,062 పోలింగ్ కేంద్రాలు ఉన్నాయి. క్రమబద్ధీకరణ తర్వాత వీటి సంఖ్య తగ్గుతుంది.