ప్రధాని మోదీ: కరోనా, యుద్ధ ఉద్రిక్తతల నడుమా భారత్ 2047 లక్ష్యం వైపు

ప్రధాని నరేంద్ర మోదీ మాట్లాడుతూ, గత 10–12 ఏళ్లలో కరోనా, యుద్ధ ఉద్రిక్తతల వంటి సంక్షోభాలను ఎదుర్కొంటూనే భారత్ 2047 లక్ష్యం వైపు ముందుకు సాగుతోందని చెప్పారు. దేశం గత దశాబ్దం పైగా ఒకో మెట్టు ఎక్కుతూ లక్ష్యాన్ని చేరుకునే దిశగా నడుస్తోందని, అయితే ఈ ప్రయాణంలో ఊహించని ఇబ్బందులు ఎదురయ్యాయని ఆయన తెలిపారు. కరోనా మహమ్మారి సమయంలో ప్రపంచంలోని అనేక వ్యవస్థలు చతికిలబడినా భారత్ సంక్షోభాన్ని ఎదుర్కొందని వివరించారు. కరోనా నుంచి బయటపడ్డాక యుక్రెయిన్, పశ్చిమాసియా ప్రాంతాల్లో యుద్ధ వార్తలు, ఉద్రిక్తతలు నెలకొన్నాయని గుర్తుచేశారు. ఈ నేపథ్యంలో కొందరు దేశాన్ని భయపెట్టడం, ఆందోళనకు గురిచేయడంలోనే సంతృప్తి పొందుతున్నారని ప్రధాని అన్నారు. కరోనా సమయంలో వ్యాక్సిన్ రాదు, కోవిడ్ నుంచి ప్రజలు బతకరు, ఏమీ జరగదు అనే ప్రచారాలు జరిగాయని, కానీ దేశం వాటన్నింటినీ తప్పుగా నిరూపించిందని ఆయన పేర్కొన్నారు.