44 ఏళ్ల క్రితం సౌదీ వెళ్లిన వ్యక్తి మృతదేహంగా తిరిగి వచ్చారు

సిద్దిపేట జిల్లా దుబ్బాక మండలం చెల్లాపూర్‌కు చెందిన బొట్ల చంద్రయ్య 44 ఏళ్ల క్రితం సౌదీ అరేబియాకు వెళ్లారు. ఆయన చనిపోయినట్లు కుటుంబానికి ఇటీవల సమాచారం అందింది. మృతదేహాన్ని స్వగ్రామానికి తీసుకురాగా, అంత్యక్రియలు ముగిశాయి.

చంద్రయ్యకు 1982లో లక్ష్మితో వివాహమైంది. భార్యాభర్తలు ఆరేళ్లు కలిసి జీవించారు. తర్వాత చంద్రయ్య ఉపాధి కోసం సౌదీ అరేబియాకు వెళ్లారు. అప్పటి నుంచి ఆయన నుంచి ఎలాంటి సమాచారం లేదు. ఆయన తల్లిదండ్రులు చనిపోయినప్పుడు కోడలు లక్ష్మినే కొడుకుగా భావించి అంత్యక్రియలు నిర్వహించింది.

చంద్రయ్య వీసా 15 ఏళ్ల క్రితమే గడువు ముగిసింది. నెల రోజుల క్రితం సౌదీలోని ఆస్పత్రిలో ఆయన మృతి చెందారు. పాత వీసా వివరాల ఆధారంగా అధికారులు ఆయన సొంత గ్రామాన్ని గుర్తించారు. భారత రాయబార కార్యాలయానికి సమాచారం ఇచ్చారు.

ప్రవాసి తెలుగు సంఘం కార్యకర్త ఫారూక్ రెండు వారాలు శ్రమించి, సామాజిక మాధ్యమాల ద్వారా కుటుంబాన్ని గుర్తించారు. మృతదేహాన్ని స్వదేశానికి తీసుకువచ్చాక కొద్ది రోజుల క్రితం అంత్యక్రియలు నిర్వహించారు.

చంద్రయ్య ఇన్నేళ్లలో తనకు ఒక్కసారైనా ఫోన్ చేయలేదని, డబ్బులు పంపలేదని భార్య లక్ష్మి కన్నీటి పర్యంతమయ్యారు. ఒంటరి మహిళగా గుర్తించి ప్రభుత్వం తనకు పింఛన్ ఇస్తోందని ఆమె చెప్పారు.