జంగారెడ్డిగూడెం బ్యాంక్ గోల్డ్ మాయం కేసు ఛేదన: అప్రైజర్ అరెస్ట్, 4.12 కేజీల బంగారం రికవరీ

ఏలూరు జిల్లా జంగారెడ్డిగూడెం లోని బ్యాంక్ ఆఫ్ బరోడా శాఖలో బంగారు ఆభరణాలు మాయమైన కేసును పోలీసులు ఛేదించారు. బ్యాంకులో గోల్డ్ అప్రైజర్‌గా పనిచేస్తున్న చెలపాక రాజు అనే వ్యక్తిని అరెస్ట్ చేశారు.

నిందితుడి నుంచి 4 కిలోల 120 గ్రాముల బంగారు ఆభరణాలను, రూ.10 లక్షల నగదును స్వాధీనం చేసుకున్నారు. మొత్తం సుమారు 6.5 కిలోల బంగారం మాయమైందని, అందులో 2 కిలోల 329 గ్రాముల ఆభరణాలను నిందితుడు విక్రయించినట్టు పోలీసులు గుర్తించారు. మిగిలిన బంగారాన్ని రికవరీ చేసేందుకు, నిందితుడి ఆర్థిక లావాదేవీలపై దర్యాప్తు కొనసాగుతోంది.

ఈ మోసం వల్ల 176 కుటుంబాలు నష్టపోయాయని, వారికి న్యాయం చేకూర్చుతామని ఏలూరు జిల్లా ఎస్పీ ప్రతాప్ శివకిషోర్ తెలిపారు. బాధిత కుటుంబాలకు స్వాధీనం చేసుకున్న బంగారం, నగదు త్వరలో అందజేస్తామన్నారు.

బ్యాంక్ అధికారుల నిర్లక్ష్యమే ఈ మోసానికి దారితీసిందని, ఆడిట్ ప్రక్రియ కూడా విఫలమైందని ఎస్పీ పేర్కొన్నారు. బ్యాంకులో నిర్లక్ష్యం వహించిన, ఉద్దేశపూర్వకంగా లబ్ధి పొందిన అధికారులపై చర్యలు తీసుకుంటామని, వారి ఆస్తులు జప్తు చేస్తామని చెప్పారు. కేసుపై సమగ్ర విచారణ కొనసాగుతోంది.