చంద్రాపూర్‌లో మరో పులి బంధనం.. ఆరుగురిని చంపిన 'త్రిశూల్' అటవీ శాఖ అదుపులో

మహారాష్ట్రలోని చంద్రాపూర్ అడవుల్లో మనుషులపై దాడి చేసినట్టు చెప్పబడుతున్న పులిని అటవీ శాఖ సిబ్బంది బంధించారు. ఈ పులిని 'త్రిశూల్' అని పిలుస్తున్నారు.

ఏప్రిల్ నుంచి ఆరు నెలల్లో ఈ పులి ఆరుగురిని చంపినట్టు అటవీ శాఖ అధికారులు తెలిపారు. దీంతో చంద్రాపూర్, ఆదిలాబాద్ సరిహద్దు గ్రామాల ప్రజలు భయంతో ఉన్నారు. పులిని పట్టుకోవడానికి అటవీ శాఖ ఆరు నెలల పాటు నిరంతరం శ్రమించింది.

రెండు రోజుల క్రితం చీమూర్ రేంజ్‌లో ట్రాప్ కెమెరా ఫుటేజ్‌లో పులి కదలికలు కనిపించాయి. ఆ ప్రాంతంలో ఎర వేసి మాటు వేశారు. సూపర్‌వైజర్ రమాకాంత్ పర్యవేక్షణలో షూటర్ అజయ్ మత్తు ఇంజెక్షన్ వేశారు. పులికి ప్రాణహాని లేకుండా బంధించి, చికిత్స కోసం చంద్రాపూర్‌లోని ట్రీట్‌మెంట్ సెంటర్‌కు తరలించారు.

వారం క్రితం ఇదే అటవీ శాఖ బృందం '139 ESV' అనే మరో పులిని బంధించింది. అక్టోబర్ 31న ఆ పులిని ట్రాప్ చేశారు. మనుషులను టార్గెట్ చేసి దాడి చేస్తున్నట్టు ఆ పులిపై ఆరోపణ ఉంది. ఒకే వారంలో రెండు పులులను బంధించడంతో 'ఆపరేషన్ టైగర్' పూర్తయినట్టు అధికారులు తెలిపారు.

బంధించిన రెండు పులులను అటవీ శాఖ ఎక్కడ విడిచిపెడుతుందనేది తర్వాత తెలియాల్సి ఉంది. ప్రస్తుతం రెండూ చంద్రాపూర్‌లో చికిత్స పొందుతున్నాయి.