చీరాల-సూర్యలంక బీచ్ కారిడార్ ప్రతిపాదన, చీరాల సమీపంలో చిన్న విమానాశ్రయం: CM చంద్రబాబు

ఆంధ్రప్రదేశ్ ముఖ్యమంత్రి చంద్రబాబు నాయుడు బాపట్ల జిల్లా చీరాల, సూర్యలంక తీరాలను అభివృద్ధి చేసే ప్రతిపాదనలను వెల్లడించారు. సూర్యలంక నుంచి చీరాల వరకు 15 కిలోమీటర్ల మేర బీచ్ కారిడార్‌ను తయారు చేస్తామని ఆయన ప్రకటించారు. అవసరమైతే చీరాల సమీపంలో ఒక చిన్న విమానాశ్రయం నిర్మించే ఆలోచన కూడా ఉందని తెలిపారు.

స్వదేశ్ దర్శన్ 2 పథకం కింద ఇటీవలే రూ.97 కోట్లు మంజూరైనట్టు చంద్రబాబు తెలిపారు. ఈ నిధులతో సూర్యలంక, చీరాల బీచులను ప్రపంచస్థాయి పర్యాటక కేంద్రాలుగా మార్చాలని లక్ష్యంగా ఉన్నట్టు చెప్పారు. గోవా తరహాలో అభివృద్ధి సాధ్యమవుతుందని విశ్వాసం వ్యక్తం చేశారు.

గత ప్రభుత్వ హయాంలో రోడ్లు గుంతలతో నిండి ఉన్నాయని, ప్రస్తుతం ఆ రోడ్లన్నింటినీ బాగుచేస్తున్నామని సీఎం పేర్కొన్నారు. రెండేళ్లలో ఏపీలో రూ.22 లక్షల కోట్ల విలువైన అవగాహన ఒప్పందాలు (MoUs) కుదిరాయన్నారు. రూ.12 లక్షల కోట్ల ప్రాజెక్టులు ఇప్పటికే మొదలయ్యాయని, ఈ ప్రాజెక్టులు పూర్తయితే 12 లక్షల మందికి ఉద్యోగాలు లభిస్తాయని వివరించారు.

విద్యార్థులకు నాణ్యమైన విద్యతోపాటు చదువు పూర్తయిన వెంటనే ఉద్యోగాలు వచ్చే వాతావరణం కల్పించే బాధ్యత ప్రభుత్వంపై ఉందని చంద్రబాబు అన్నారు. రాష్ట్ర ఖజానా ప్రస్తుతం ఖాళీగా ఉన్నా, కొత్త పెట్టుబడులు తీసుకొచ్చి సంపాదించి పేదల సంక్షేమానికి ఖర్చు చేస్తానని హామీ ఇచ్చారు. ఇప్పటికే రూ.1.5 లక్షల కోట్లు సంక్షేమ కార్యక్రమాలకు ఖర్చు చేసినట్టు తెలిపారు.