మేడ్చల్ లో పేకాట దాడి: మెదక్ మాజీ డీసీసీబీ చైర్మన్ చిట్టి దేవేందర్ రెడ్డి అరెస్ట్

మేడ్చల్ జిల్లా పేట్ బషీరాబాద్ పోలీస్ స్టేషన్ పరిధిలోని ఓ అపార్ట్‌మెంట్‌లో పేకాట జరుగుతున్నట్టు సమాచారం రావడంతో కుత్బుల్లాపూర్ SOT పోలీసులు దాడి చేశారు. ఎనిమిది మందిని రెడ్ హ్యాండెడ్‌గా అదుపులోకి తీసుకున్నారు. వారిలో మెదక్ డీసీసీబీ మాజీ చైర్మన్ చిట్టి దేవేందర్ రెడ్డి కూడా ఉన్నారు. అక్కడి నుంచి ₹3,28,000 నగదును స్వాధీనం చేసుకున్నారు.

ప్రస్తుతం సిద్దిపేట జిల్లా కాంగ్రెస్ నాయకుడిగా ఉన్న దేవేందర్ రెడ్డి, పేకాట వ్యవహారంలో పట్టుబడటం ఇది రెండోసారి. గతంలోనూ ఇదే విధమైన కేసులో పోలీసులకు దొరికారు. చీకోటి మధు, చీకటి ప్రవీణ్ లతో పాటు హెలికాప్టర్‌లో తిరిగిన ఫోటోలు, వీడియోలు ఈయన ప్రమేయం ఉన్న ఇతర నగదు వ్యవహారాలను గుర్తు చేశాయి.

దాడి అనంతరం కొందరు నిందితులు రాజకీయ ఒత్తిళ్లు తీసుకువచ్చినా పోలీసులు లొంగిపోలేదు. చిట్టి దేవేందర్ రెడ్డితో సహా అందరినీ అధికారికంగా అరెస్టు చూపారు. ఈ కేసుపై విచారణ కొనసాగుతోంది.