కుప్పం పర్యటనలో CM చంద్రబాబు: వైసీపీ సోషల్ మీడియా గ్రూపులకు ఫండింగ్ చేస్తోందని ఆరోపణ

ఏపీ ముఖ్యమంత్రి చంద్రబాబు నాయుడు తన సొంత నియోజకవర్గమైన కుప్పంలో పర్యటించారు. ఈ సందర్భంగా ఆయన వైసీపీపై పలు ఆరోపణలు చేశారు.

తనపై, ఉపముఖ్యమంత్రి పవన్ కళ్యాణ్‌పై విమర్శలు చేసేందుకు కొన్ని సోషల్ మీడియా గ్రూపులకు వైసీపీ పెద్దఎత్తున నిధులు సమకూరుస్తోందని చంద్రబాబు ఆరోపించారు. వైసీపీ హింస, దూషణల రాజకీయాలు చేస్తూ ఫ్యాక్షన్ రౌడీలను ప్రోత్సహిస్తోందని విమర్శించారు. అయినా కూటమి ప్రభుత్వ ప్రగతి ఎవరూ ఆపలేరని స్పష్టం చేశారు.

కుప్పంలో గతంలో ఎన్నడూ లేని విధంగా అభివృద్ధి ప్రాజెక్టులు వస్తున్నాయని, రోడ్లు, కమ్యూనికేషన్ సహా అన్ని రంగాల్లోనూ కనెక్టివిటీ పెరుగుతోందని చంద్రబాబు తెలిపారు. హంద్రీనీవా కాలువ ద్వారా కృష్ణా జలాలు కుప్పం వరకు తీసుకువచ్చినట్లు, గాలేరు నగరి ప్రాజెక్టు త్వరలో పూర్తి చేస్తామన్నారు.

రాష్ట్రంలో వికేంద్రీకృత అభివృద్ధిపై దృష్టి పెట్టామని, డిసెంబర్ నాటికి అమరావతిలో క్వాంటం కంప్యూటింగ్ సెంటర్ సిద్ధమవుతుందని చంద్రబాబు ప్రకటించారు. గత ప్రభుత్వంపై కూడా విమర్శలు చేశారు. ఏజెన్సీ ప్రాంతాన్ని గంజాయి సాగుకు కేంద్రంగా మార్చారని, తిరుమల ప్రసాదాన్ని కల్తీ చేసి భక్తుల మనోభావాలు దెబ్బతీశారని ఆరోపించారు.

ఈ ఆరోపణలపై వైసీపీ స్పందన తెలియాల్సి ఉంది.