సీఎం రేవంత్ రెడ్డి: మానవ సంబంధాలు, కుటుంబ బంధాలే దేశ బలం

తెలంగాణ ముఖ్యమంత్రి రేవంత్ రెడ్డి మానవ సంబంధాల ప్రాముఖ్యతపై ప్రసంగించారు. ఒక దేశం ఎంత అభివృద్ధి చెందినా, మానవ సంబంధాలు లేకపోతే అది నిలబడలేదని అన్నారు.

పూర్వం పెద్ద కుటుంబాలు ఉండేవని, ఇప్పుడు చాలా కుటుంబాల్లో ఒక్కరే పిల్లవాడు ఉండటంతో తల్లిదండ్రులు ఎక్కువ ఆందోళన చెందుతున్నారని చెప్పారు. తన సొంత కుటుంబం ఉదాహరణగా చెప్పుకుంటూ ఏడుగురు అన్నదమ్ములు, ఒక సోదరితో పెరిగిన అనుభవాన్ని గుర్తుచేశారు.

పిల్లల్ని హాస్టల్‌ల్లో వదిలి పంపడం వల్ల కుటుంబ సంబంధాలు బలహీనపడతాయని హెచ్చరించారు. పిల్లలు ఇంటి దగ్గర ఉంటే వారు ఒత్తిడిని తగ్గించి, భార్యాభర్తల మధ్య చిన్న చిన్న మనస్పర్థల్ని తగ్గించగలరని తెలిపారు.

హాస్టల్‌ల్లో పెరిగిన పిల్లలు పెద్దయ్యాక తల్లిదండ్రులను వృద్ధాశ్రమాల్లో చేర్చే అవకాశం ఉందని అభిప్రాయపడ్డారు. సమాజంలో మానవ సంబంధాలు దెబ్బతింటే దేశం బలంగా నిలవదని వ్యాఖ్యానించారు.

ఈ సందర్భంగా విద్యపై మాట్లాడుతూ, దేశ భవిష్యత్తు తరగతి గదుల్లో, ఉపాధ్యాయుల చేతుల్లోనే ఉందని నొక్కి చెప్పారు. విద్యా రంగంపై ఎక్కడైనా దుబార ఖర్చు ఉంటే తగ్గిస్తానని, అవసరమైన చోట ఖర్చు పెడతానని హామీ ఇచ్చారు. టీచర్లు పిల్లల కోసం ఏం కావాలన్నా అడగాలని కోరారు.