119 యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లు ఏర్పాటు: సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి 119 యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల ఏర్పాటును ప్రకటించారు. ఈ స్కూళ్లు వచ్చే విద్యా సంవత్సరం నుంచి అందుబాటులోకి వస్తాయని చెప్పారు. ఒక్కో స్కూల్ 25 ఎకరాల విస్తీర్ణంలో నిర్మించబడుతుంది. ఇందులో 2005 మంది విద్యార్థులు ఎస్సీ, ఎస్టీ, బీసీ, మైనారిటీ, ఇతర కులాల వారు కలిసి చదువుతారు.

నర్సరీ నుంచి 12వ తరగతి వరకు విద్య అందించే ఈ స్కూళ్లు కార్పొరేట్ స్థాయి సౌకర్యాలతో ఉంటాయని సీఎం తెలిపారు. ఇప్పటికే ప్రతి నియోజకవర్గానికి ఒక తెలంగాణ పబ్లిక్ స్కూల్ ఏర్పాటు చేశామన్నారు. ఆరుట్లలోని మోడల్ స్కూల్‌కు 1814 మంది విద్యార్థులకు ప్రవేశం కల్పించగా, మరో 1500 దరఖాస్తులు రావడంతో ‘నో అడ్మిషన్’ బోర్డు పెట్టాల్సి వచ్చిందని వివరించారు.

ఈ కొత్త విధానం కోసం ఒక సీనియర్ రిటైర్డ్ ఐఏఎస్ అధికారి నేతృత్వంలో విద్యా కమిషన్‌ను నియమించినట్టు సీఎం ప్రకటించారు. నేషనల్ ఎడ్యుకేషన్ పాలసీతో పాటు తెలంగాణ ఎడ్యుకేషన్ పాలసీ ఆధారంగా ఈ నిర్ణయం తీసుకున్నామని తెలిపారు. ప్రభుత్వ పాఠశాలల్లో నాణ్యమైన విద్య అందించడమే లక్ష్యమని ఆయన అన్నారు.

అన్ని వర్గాల విద్యార్థులు ఒకే చోట హాస్టల్ సౌకర్యంతో చదివే ఈ సమీకృత పాఠశాలలు కుల వ్యవస్థ నిర్మూలనకు ఉపయోగపడతాయని సీఎం అభిప్రాయపడ్డారు. వచ్చే అకాడమిక్ ఇయర్ నాటికి 119 స్కూళ్లు పూర్తి చేసి, వాటిని దేశానికి రోల్ మోడల్‌గా తీర్చిదిద్దే బాధ్యత ప్రభుత్వం తీసుకుందని పేర్కొన్నారు.