Congress కోఆర్డినేషన్ కమిటీ సమావేశం ఢిల్లీలో; పార్టీ-ప్రభుత్వ సమన్వయం, అంతర్గత క్రమశిక్షణపై చర్చ

నేడు ఢిల్లీలో AICC కార్యాలయంలో Congress Coordination Committee సమావేశం జరగనుంది. తెలంగాణలో పార్టీ ప్రభుత్వం మధ్య సమన్వయాన్ని మెరుగుపరచడానికి పార్టీ అధిష్టానం ఈ కమిటీని ఏర్పాటు చేసింది. ఈ సమావేశం ఉదయం 10 గంటలకు ప్రారంభమవుతుంది.

ఈ సమావేశంలో ముఖ్యమంత్రి రేవంత్ రెడ్డి, PCC చీఫ్ మహేష్ కుమార్ గౌడ్, తెలంగాణ కాంగ్రెస్ ఇంచార్జ్ మీనాక్షి నటరాజన్, డిప్యూటీ సీఎం భట్టి విక్రమార్క, మంత్రులు ఉత్తం కుమార్ రెడ్డి, సీతక్క, దామోదర రాజనరసింహ, CWC సభ్యుడు చెల్లా వంశీ చంద్ర రెడ్డి పాల్గొంటారు.

పార్టీ బలోపేతంపై ఈ సమావేశంలో చర్చించనున్నారు. జిల్లాల వారీగా నేతలతో సమావేశాలు, అంతర్గత విభేదాల పరిష్కారంపై చర్యలు తీసుకోవాలని నిర్ణయించనున్నారు. బహిరంగ విమర్శలకు అవకాశం ఇవ్వకుండా చర్యలు తీసుకోవడంపైనా దృష్టి పెట్టనున్నారు.

ఇంతకు ముందు, సీఎం రేవంత్ రెడ్డి, PCC అధ్యక్షుడు మహేష్ గౌడ్ AICC ప్రధాన కార్యదర్శి KC వేణుగోపాల్‌తో ప్రత్యేకంగా భేటీ అయ్యారు. ఈ భేటీలో రాష్ట్రంలో పార్టీ-ప్రభుత్వ సమన్వయం లోపించిందన్న నివేదికలపై గట్టి చర్చ జరిగినట్టు తెలుస్తోంది. మంత్రులు సొంత నియోజకవర్గాలు, శాఖలకే పరిమితం అవుతున్నారని, జిల్లా ఎమ్మెల్యేలను పట్టించుకోవడం లేదన్న ఫిర్యాదులు అధిష్టానానికి అందాయి.

పార్టీకి నష్టం కలిగించేలా వ్యవహరించే నేతలపై క్రమశిక్షణ చర్యలు తీసుకోవడానికి అధిష్టానం సిద్ధంగా ఉందని కాంగ్రెస్ వర్గాలు చెబుతున్నాయి. సీనియర్ నేతల విషయంలో అవసరమైతే హై కమాండ్ నేరుగా జోక్యం చేసుకుంటుందని, AICC పరిశీలకులను పంపి చర్యలు తీసుకుంటుందని సమాచారం.