AP లో 2 MLC స్థానాలు ఖాళీ: TDP హై కమాండ్ కసరత్తు

ఆంధ్రప్రదేశ్‌లో గవర్నర్ కోటా కింద రెండు MLC పదవులు ఈ నెల 28న ఖాళీ అవుతున్నాయి. ప్రస్తుతం శాసన మండలి డిప్యూటీ చైర్మన్ జాకియా ఖానం, YSRCP MLC పండుల రవీంద్రబాబు పదవీ కాలం ఈ నెల చివరికి ముగుస్తుంది. ఈ నేపథ్యంలో ఈ రెండు స్థానాలను ఎవరికి కేటాయించాలనే అంశంపై TDP హై కమాండ్ తీవ్ర కసరత్తు చేస్తోంది.

MLC పదవుల రేసులో పలువురు నేతల పేర్లు పరిశీలనలో ఉన్నాయి. TDP సీనియర్ నేత వల్లభనేని వరలరామయ్య పేరు ప్రధానంగా పరిశీలనలో ఉన్నట్లు తెలుస్తోంది. ఆయన గతంలో రెండుసార్లు రాజ్యసభకు వెళ్ళాలని ప్రయత్నించినా అవకాశం దక్కలేదు. ఇప్పుడు గవర్నర్ కోటా ద్వారా MLC పదవి ఆయనకు కేటాయించే అవకాశం ఉందని సమాచారం అందుతోంది.

రెండో స్థానానికి రాయలసీమకు చెందిన ఒక కీలక నేత పేరు పరిశీలనలో ఉన్నట్లు తెలుస్తోంది. ఆయన కూడా రాజ్యసభ పదవి కోసం ప్రయత్నించినా అవకాశం దక్కలేదు.

ఈ రేసులో వంగవీటి రాధ, దేవినేని ఉమా, పిఠాపురం వర్మ, పల్నాడు జిల్లా మాజీ MLA కొమ్మలపాటి శ్రీధర్ పేర్లు కూడా వినిపిస్తున్నాయి. వంగవీటి రాధ పేరు ప్రతి పదవి విషయంలోనూ చర్చకు వస్తోంది. సోషల్ మీడియాలో ఆయనకు నామినేటెడ్ కోటాలో పదవి వస్తుందనే చర్చ జరుగుతోంది.

పవన్ కళ్యాణ్ కోసం టికెట్ వదులుకున్న పిఠాపురం వర్మకు, భాష్యం ప్రవీణ్ కోసం సీటు కోల్పోయిన కొమ్మలపాటి శ్రీధర్‌కు న్యాయం చేయాలని TDP అధిష్టానం ఆలోచిస్తోందని తెలుస్తోంది. చంద్రబాబు నాయుడుకు సన్నిహితుడైన దేవినేని ఉమా పేరు కూడా పరిశీలనలో ఉంది. అంతిమంగా అదృష్టం ఎవరికి దక్కుతుందో వేచి చూడాల్సిన పరిస్థితి నెలకొంది.