AI ప్రభావంతో కోర్ ఇంజనీరింగ్‌కు పెరిగిన డిమాండ్: ECE, మెకానికల్‌కు విద్యార్థుల మొగ్గు

తెలంగాణలో కోర్ ఇంజనీరింగ్ బ్రాంచ్‌లకు డిమాండ్ పెరుగుతోంది. AI కారణంగా ఎంట్రీ లెవల్ సాఫ్ట్‌వేర్ ఉద్యోగాలపై అనిశ్చితి నెలకొనడంతో విద్యార్థులు కంప్యూటర్ సైన్స్, ఐటీ బదులు ECE, మెకానికల్ వంటి కోర్ కోర్సులపై ఆసక్తి చూపిస్తున్నారు.

ఐఐటీ బాంబేలో జోసా కౌన్సెలింగ్ తొలివిడతలో మెకానికల్‌కు కటాఫ్ ర్యాంకు 480-490 వద్ద నిలిచింది. ఇది కోర్ బ్రాంచ్‌లపై పెరిగిన ఆదరణను సూచిస్తోంది. ఏఐ నేర్చుకోకపోతే భవిష్యత్తులో సాఫ్ట్‌వేర్ ఉద్యోగాలకు ఇబ్బంది తలెత్తొచ్చన్న అంచనాలు, సెమీకండక్టర్, స్పేస్, ఎలక్ట్రానిక్స్ రంగాల్లో కొలువుల పెరుగుదల వంటి అంశాలు ఈ మార్పుకు కారణమవుతున్నాయి.

ఈ నెల 25న రాష్ట్రంలో ఇంజనీరింగ్ కౌన్సెలింగ్ వెబ్ ఆప్షన్లు ప్రారంభం కానున్నాయి. గత ఏడాది తెలంగాణలో ECE సీట్ల భర్తీ 90%కి చేరింది. 2023-24లో 16,772 సీట్లకు 13,178 నిండగా, 2024-25లో సీట్ల సంఖ్య 15,634కు తగ్గినా 14,233 మంది ఈ కోర్సును ఎంచుకున్నారు.

ప్రైవేటు కాలేజీల యాజమాన్యాలు, JNTU అధ్యాపకులు కూడా ఇదే ధోరణిని గమనిస్తున్నారు. మేనేజిమెంట్ కోటా సీట్ల కోసం వచ్చే తల్లిదండ్రులు కూడా కోర్ బ్రాంచ్‌ల భవిష్యత్తుపై వివరాలు అడుగుతున్నారు. కోర్ కోర్సుల ఫీజులు తగ్గడం కూడా ఆసక్తికి ఒక కారణంగా చెప్తున్నారు.