పత్తి సాగులో కలుపు నివారణకు శాస్త్రవేత్త సూచనలు

తెలంగాణలో పత్తి సాగు విస్తీర్ణం గణనీయంగా పెరిగింది. ప్రస్తుతం పంట 10 నుండి 40 రోజుల దశలో ఉంది. ఇటీవల కురిసిన వర్షాలతో కలుపు విపరీతంగా పెరిగి పంట ఎదుగుదలకు ఆటంకంగా మారింది.

మంచిర్యాల జిల్లా బెల్లంపల్లి కృషి విజ్ఞాన కేంద్రం శాస్త్రవేత్త తిరుపతి రైతులకు కలుపు నివారణ చర్యలను వివరించారు. ఆయన సూచనలు ఇలా ఉన్నాయి.

పత్తి విత్తనాలు విత్తిన 48 గంటల్లోనే ముందస్తు కలుపు నివారణ చేపట్టాలి. ఇందుకు పెండిమెథాలిన్ 36% EC అనే కలుపు మందును 'స్టాంప్' పేరుతో మార్కెట్లో పొందవచ్చు. దీన్ని 1.2 లీటర్లు 200 లీటర్ల నీటిలో కలిపి ఎకరానికి పిచికారి చేయాలి. లేదా పెండిమెథాలిన్ 38.7% CS 'స్టాంప్ ఎక్స్‌ట్రా' మందును ఎకరానికి 700 మి.లీ. చొప్పున నీటిలో కలిపి పిచికారి చేయవచ్చు.

పంట వయసు నెల రోజులు దాటిన తర్వాత వచ్చే కలుపు నివారణకు పోస్ట్ ఎమర్జెన్స్ హెర్బిసైడ్స్ ఉపయోగించాలి. వెడల్పాటి ఆకుల కలుపు మొక్కలను నివారించేందుకు పైరిథియోబాక్ సోడియం అనే మందును 250 మి.లీ. ను 200 లీటర్ల నీటిలో కలిపి ఎకరానికి పిచికారి చేయాలి. గడ్డి జాతి కలుపును నివారించడానికి క్విజలాఫాప్ ఇథైల్ 450 మి.లీ. ను 200 లీటర్ల నీటిలో కలిపి పిచికారి చేయాలి. ఈ మందులు కలుపు మొక్కలు 2-4 ఆకుల దశలో ఉన్నప్పుడే పిచికారి చేయడం మంచి ఫలితాన్నిస్తుంది.

యాంత్రిక పద్ధతిలో అంతర కృషి గొర్రు లేదా పటకతో ప్రతి 7-10 రోజులకు ఒకసారి 45-50 రోజుల వరకు కలుపు తొలగించాలి. సకాలంలో కలుపు యాజమాన్యం పాటిస్తే పత్తి దిగుబడి 30-50 శాతం వరకు పెరిగే అవకాశం ఉందని శాస్త్రవేత్త తెలిపారు.