డిసెంబర్‌లో తెలంగాణ రైజింగ్ 2026 గ్లోబల్ సమ్మిట్‌కు ఏర్పాట్లు: సీఎస్ సంజయ్ జాజు సమీక్ష

తెలంగాణ ప్రభుత్వం డిసెంబర్ నెలలో 'తెలంగాణ రైజింగ్ 2026' గ్లోబల్ సమ్మిట్ నిర్వహించనుంది. ఈ నేపథ్యంలో రాష్ట్ర ప్రభుత్వ ప్రధాన కార్యదర్శి (సీఎస్) సంజయ్ జాజు ఉన్నతస్థాయి సమీక్ష నిర్వహించారు.

ఆ సమావేశంలో అన్ని శాఖల అధికారులు సమన్వయంతో ఏర్పాట్లు చేయాలని ఆయన ఆదేశించారు. జాతీయ, అంతర్జాతీయ సంస్థల సహకారం పెంపొందించడం, పెట్టుబడులు ఆకర్షించడం, జీఎస్‌డీపీ వృద్ధి సాధించడం వంటి లక్ష్యాలతో ఈ సమ్మిట్ నిర్వహిస్తున్నట్లు తెలిపారు. రాష్ట్ర అభివృద్ధి, పారిశ్రామిక వృద్ధి, మౌలిక సదుపాయాలు, నైపుణ్య అభివృద్ధి, ఆవిష్కరణలు, ఉపాధి కల్పన, సంక్షేమం తదితర అంశాలపై ప్రభుత్వం 'తెలంగాణ రైజింగ్' కార్యక్రమం అమలు చేస్తోందని, దేశంలో తెలంగాణను అగ్రస్థానంలో నిలపడమే లక్ష్యమని సీఎస్ వివరించారు.

సమ్మిట్ నిర్వహణ కోసం భారత ఫ్యూచర్ సిటీలో నిర్మాణంలో ఉన్న యంగ్ ఇండియా స్కిల్ యూనివర్సిటీ భవన సముదాయాలను వేదికగా ఉపయోగించుకోవాలని సూచించారు. అలాగే సమ్మిట్ నాటికి రోడ్లు, విద్యుత్, తాగునీరు వంటి మౌలిక సదుపాయాలను సిద్ధం చేయాలని ఆదేశించారు. డిజిటల్ సేవలను సమర్థవంతంగా అందించడంతోపాటు వివిధ అంశాలపై సమావేశంలో చర్చించారు.