హైదరాబాద్లో ‘క్యూర్ వన్’ యాప్: అన్ని బిల్లులు ఒకే వేదికపై చెల్లింపు
హైదరాబాద్లోని జీహెచ్ఎంసీ, మల్కాజ్గిరి, సైబరాబాద్ మున్సిపల్ కార్పొరేషన్ల పరిధిలో నివసించే ప్రజలు వివిధ బిల్లులు ఒకే యాప్లో చెల్లించేందుకు ‘క్యూర్ వన్’ పేరుతో ప్రత్యేక యాప్ సిద్ధమైంది.
మెట్రోపాలిటన్ ఏరియా అర్బన్ డెవలప్మెంట్ ప్రత్యేక ప్రధాన కార్యదర్శి జయేష్ రంజన్ ఈ మేరకు ఉత్తర్వులు జారీ చేశారు. ఆస్తి పన్ను, ట్రేడ్ లైసెన్స్, స్వీయ అంచనా పన్ను, సూపర్ స్ట్రక్చర్ ఫీజు, ఖాళీ స్థలాల పన్ను, మంచినీరు-సీవరేజీ చార్జీలు (జలమండలి), విద్యుత్ బిల్లులు (ఎస్పీడీసీఎల్), ట్రాఫిక్ చలాన్లు వంటివి ఈ యాప్లో చెల్లించవచ్చని ప్రభుత్వం తెలిపింది.
మూడు కార్పొరేషన్ల పరిధిలోని అన్ని శాఖలు 90 రోజుల్లో ఈ యాప్ను అమలు చేయాలని ఆదేశాలు జారీ అయ్యాయి. యాప్ నిర్వహణ బాధ్యతను సీజీజీ మీసేవ విభాగానికి అప్పగించారు. నోడల్ శాఖగా మీసేవ వ్యవహరిస్తుంది. డేటా భద్రత, గోప్యత విషయంలో కేంద్ర, రాష్ట్ర ప్రభుత్వాల భద్రతా ప్రోటోకాల్స్ పాటించాలని స్పష్టం చేశారు.
వివిధ విభాగాల సమన్వయం కోసం ఒక ఉన్నతాధికారుల కమిటీని ఏర్పాటు చేశారు. ఛైర్ పర్సన్గా జయేష్ రంజన్, కన్వీనర్గా మీసేవ డైరెక్టర్, కో-కన్వీనర్గా ఎస్పీడీసీఎల్ సీఎండీ ఉంటారు. జీహెచ్ఎంసీ, మల్కాజ్గిరి, సైబరాబాద్ కమిషనర్లు, ఐటీ అదనపు కమిషనర్, జలమండలి ఎండీ, హైదరాబాద్ ట్రాఫిక్ పోలీస్ కమిషనర్ సభ్యులుగా ఉంటారు. ఈ కమిటీ నెలకొకసారైనా సమావేశమై యాప్ నిర్వహణ, అభివృద్ధిపై చర్చించి నిర్ణయాలు తీసుకుంటుంది. ఫిర్యాదుల కోసం టోల్ ఫ్రీ నెంబర్, హెల్ప్డెస్క్లు కూడా ఏర్పాటు చేస్తారు.
వార్త ఆధారాలు: పబ్లిక్ న్యూస్ బ్రాడ్కాస్ట్లు, అధికారిక అప్డేట్లు, ఉషా కిరణం ఎడిటోరియల్ ప్రమాణాలు.
సవరణల కోసం సంప్రదించండి: help@ushakiranam.com
