యువతలో దూకుడు ప్రవర్తనకు మాదకద్రవ్యాలే కారణం: DGP CV ఆనంద్

హైదరాబాద్‌లోని ఘట్కేసర్ ప్రాంతంలో ఇటీవల యువతలో పెరిగిన దూకుడు ప్రవర్తనకు మాదకద్రవ్యాల ప్రభావమే ప్రధాన కారణమని తెలంగాణ డైరెక్టర్ జనరల్ ఆఫ్ పోలీస్ (DGP) సీవీ ఆనంద్ అభిప్రాయపడ్డారు. ఆయన ఓ ఇంటర్వ్యూలో మాట్లాడుతూ, రాత్రివేళల్లో యువత బయట తిరగడం, గాంజా వంటి మత్తుపదార్థాల వాడకం ఈ సమస్యకు కారణమని తెలిపారు.

యువత ఆలోచనలను అర్థం చేసుకునేందుకు పోలీస్ శాఖ AI-ఆధారిత సోషల్ మీడియా విశ్లేషణను రూపొందిస్తున్నట్లు DGP వెల్లడించారు. లక్షలాది సోషల్ మీడియా పోస్ట్లను విశ్లేషించి, యువతీయువకుల్లో ఉన్న భావాలను గుర్తించి, వారిని సంప్రదించి సమస్యను పరిష్కరించే దిశగా ఈ వ్యవస్థ తయారవుతోందన్నారు.

సైబర్ నేరాల విషయంలో రాష్ట్రంలో భారీగా నష్టం జరుగుతోందని ఆయన గణాంకాలతో సహా వివరించారు. గత సంవత్సరం తెలంగాణలో సాధారణ దోపిడీలు, దొంగతనాల్లో 250 కోట్లు నష్టం జరగ్గా, సైబర్ నేరాల్లో ఏకంగా 1,750 కోట్ల రూపాయలు ప్రజలు పోగొట్టుకున్నారని తెలిపారు. ముఖ్యంగా ఇన్వెస్ట్‌మెంట్ ఫ్రాడ్ ల ద్వారానే ఎక్కువ మొత్తంలో డబ్బు పోయిందని, ఇది 'సైలెంట్ క్రైమ్'గా మారిందని DGP వివరించారు. చాలామంది బాధితులు ఫిర్యాదు చేయడానికి కూడా ముందుకు రావడం లేదని చెప్పారు.

సైబర్ నేరాలను అరికట్టేందుకు ప్రతి పోలీస్ స్టేషన్‌లో ఒక 'సైబర్ వారియర్'ను నియమిస్తున్నట్లు ఆయన వెల్లడించారు. గ్రామీణ ప్రాంతాల్లో సైబర్ సెక్యూరిటీ బ్యూరో ద్వారా అవగాహన కార్యక్రమాలు నిర్వహిస్తున్నట్లు పేర్కొన్నారు. మాదకద్రవ్యాల నిరోధం, సైబర్ నేరాల నియంత్రణపై పోలీసు శాఖ ప్రత్యేక దృష్టి పెట్టిందని, ప్రజలు ఎక్కువగా ఫిర్యాదు చేస్తున్నందున ఫిర్యాదుల సంఖ్య ఎక్కువగా నమోదవుతోందని DGP సీవీ ఆనంద్ స్పష్టం చేశారు.