తెలంగాణ డీజీపీ వరంగల్‌లో పోలీస్ సమీక్ష; నేర నియంత్రణపై దృష్టి

తెలంగాణ డీజీపీ సివి ఆనంద్ ఉమ్మడి వరంగల్ జిల్లాలో పర్యటిస్తున్నారు. నిన్న సాయంత్రం వరంగల్ చేరుకున్న ఆయనకు పోలీస్ కమిషనర్ శ్వేతా రెడ్డి, జనగామ కలెక్టర్ సందీప్ కుమార్, ఇతర అధికారులు స్వాగతం పలికారు.

వరంగల్ కమిషనరేట్ పరిధిలోని మూడు జిల్లాల అధికారులతో డీజీపీ సమీక్ష సమావేశం నిర్వహించారు. డీఎస్పీలు, ఏసీపీలు, ఎస్హెచ్వోలు హాజరైన ఈ సమావేశంలో నేరాలు, సైబర్ క్రైమ్, పోలీసింగ్, పెట్రోలింగ్ తదితర అంశాలపై దిశానిర్దేశం చేశారు.

అనంతరం వరంగల్‌లోని మామునూరు నాలుగవ పోలీస్ బెటాలియన్‌ను సందర్శించారు. ఇవాళ ములుగు, భూపాలపల్లి, మహబూబాబాద్ జిల్లాల పోలీస్ అధికారులతో సమావేశాలు నిర్వహించనున్నారు. డ్రగ్స్ నివారణ, నేరాల నియంత్రణ, ఇసుక మరియు భూ వివాదాల నివారణపై ఈ సమావేశాల్లో ప్రత్యేక దృష్టి పెట్టనున్నారు. పోలీసులు ప్రజలతో వ్యవహరించే తీరుపై కూడా చర్చించనున్నట్లు సమాచారం.