గుంటూరు జిల్లాలో మురసు తుఫాను ప్రభావం: వందల ఎకరాల్లో పంటలు నీట మునిగాయి

గుంటూరు జిల్లాలో మురసు తుఫాను కారణంగా కురిసిన భారీ వర్షాలకు వందల ఎకరాల్లో పంటలు నీట మునిగాయి. మిర్చి, పత్తి, మినుము, వరి, కంది పంటలకు తీవ్ర నష్టం జరిగింది.

జిల్లాలో నల్లమడవాగు, గుంటూరు వాహిని ప్రమాదకర స్థాయిలో పొంగాయి. దీంతో కాలువ గట్లకు అనేక చోట్ల గండ్లు పడ్డాయి. వరద నీరు పొలాల్లోకి చేరింది.

ప్రత్తిపాడు, వట్టిచెరుకూరు, గుంటూరు రూరల్ మండలాల పరిధిలోని పొలాలు మునిగాయి. వట్టిచెరుకూరు మండలంలో వింజనంపాడు, అనంతవరపాడు మధ్య గుంటూరు వాహిని కట్ట తెగడంతో వరద ప్రవాహం వచ్చింది. వింజనంపాడు, అనంతవరపాడు, చామల్లమూడి, గారపాడు, ఇనంపూడి, వంగిపురం, అభినయన కొంటపాలెం గ్రామాల్లో మిర్చి, పత్తి, మినుము, కంది పంటలు మునిగాయి.

మిర్చి, మినుము సాగుకు ఎకరాకు ₹40,000 నుంచి ₹70,000 వరకు పెట్టుబడి పెట్టినట్టు రైతులు చెప్తున్నారు. కొందరు మిర్చి సాగుకు ఎకరాకు ₹1 లక్ష వరకు ఖర్చు చేసినట్టు తెలిపారు. పొలాల్లో రెండు అడుగుల మేర పూడిక చేరిందని వారు చెబుతున్నారు.

మరో 10 రోజులు ఆగి ఉంటే పంట చేతికి వచ్చేదని రైతులు తెలిపారు. పూత, పిందె దశలో ఉన్న మిర్చి, కాయలు కాసిన పత్తి నేలపాలైనట్టు వారు చెప్పారు. కాలువ గండ్లను వెంటనే పూడ్చి గట్లను బలోపేతం చేయాలని రైతులు కోరుతున్నారు. నష్టపరిహారం, ఆర్థిక సహాయం అందించాలని కూడా వారు ప్రభుత్వాన్ని కోరారు. గండ్లు పూడ్చకపోతే భవిష్యత్తులో సాగు కష్టమవుతుందని వారు ఆందోళన వ్యక్తం చేస్తున్నారు.